Netaji file temji tangsa sangdongtsüla: Congress

New Delhi, October 15 (Agencies): West Bengal nung assembly election agitsü atema maparen tenzükba mapang ka nung tanü Congress-i, Netaji Subhash Chandra Bose dak sentakba miima aliba file temji kechiba sangküm January 23 nü ang sayatsü (?), ibaji sorkari tangsa sayatsüla, ta shiogo.

Congress-i, Modi’er sorkari Atal Bihari Vajpayee anema-a tai tongloktsür ta ashi.

“Item kakettemji yimjak nung sangdongtsü atema kechiba sorkari January 23, 2016 tashi atar(?) Ibaji Bengal election ajanga asü (?) Parnoki tanü mesüra asüngsa sangdongtsüla. Kechiba terata nung toktsür (?)” ta party otongdar, Anand Sharma-i New Delhi nung osangbenertem dang ashi.

Netaji file sangdongtsü ta sorkari sangdongbaji Assembly election agitsü aliba ajanga lir, ta Sharma-i aitsüogo.

Sharma-isa, item file mesayaba taiji taoba sorkartem nem tai tongloktsüra Congress dang masü saka BJP lenir tain Atal Bihari Vajpayee-i aniba sorkar-a densema lir, ta ashi.

Taoba sorkar balala nem tai tongloktsüra iba nungji Vajpayee-a densema lir ta shia pai, “Indian National Congress dak temeyong tuloka tai tongloktsüra, iba temeyong jagi BJP nung kanga akhümket lenir rongnung ka, Vajpayee dak-a tai tuloktsür,” ta ashi.

Yashi Ato kilonser Narendra Modi-i, Netaji Subhash Chandra Bose dak sentakba file tem pa (Netaji) asoba anogomung, January 23, 2016 nü nungi tenzüka sangdongtsü, ta metetdakja liasü.

Bodhbar nü New Delhi 7 Race Course Road nung Ato kilonseri Netaji’er kinüngertem ajurua liasü, iba mapang nung par kinüngertemi Modi dang India sorkar ket nung aliba Netaji indang file tem sangdongtsü akhangba dak sentakba nung ghonda ka shi shisa lemsatepba sülen Modi-i , pai bendang linük sorkartem danga parnok ket nung aliba Netaji file tem sangdongang ta mepishitsü, ta shiogo.

Taoba ita West Bengal sorkari Netaji dak sentakba file 64 tashi sangdongogo. Item file ji Kolkata police aser West Bengal police ket nung liasü, aser ibaji ajanga Netaji’er kinüngertem aser yimtenren lenirtem densema tesem aisülen nungi Centre sorkar dang nüjiso atema rarasang, Netaji indang file tem sangdongtsü takhangba agüja liasü.