Netaji tayimtsü lendong nung asü: Ashish Ray

Kolkata, December 04 (Agencies): Deobarnü Netaji Subhas Chandra Bose’er kinünger researcher, Ashish Ray-i, 1945 küm Taiwan nung Netaji tayimtsü tsükokba lendong nung asü, aser pa ket nung kuli tejangja lir, ta metetdaktsü.
“Report asem lir, koba ajanga 1945 küm Bose tayimtsü tsükokba lendong nung asü aser Soviet Union-i aotsü atema maongka mengutet ta ashir,” ta Ray-i ashi.
Renkiji tekülem kidang aliba Bose arongba mitsüji India-i meyipa bener arutsüla, ta paisa takhangba agütsü.
Tamalen report ana nung- Japan sorkari, Netaji Taiwan nung tayimtsü lendong nung asü ta shiogo, aser ano Russia ket nung aliba report ka nung, Netaji-i taoba mapang 1945 nung mesüra iba sülen Soviet Union (tang Russia)-i aittsü maongka mangu, ta shia lir.
“Pa kodanga USSR nung tepouker ka ama maliasü,” ta paisa ashi.
Ajisüaka Ray-i, World War II sülen Russia-i aotsü Netaji tebilemba lir asü südi, kechiyong pai, India nunger British yimsüsüba kübok nungi salatsü atema Moscow (Russia yimtiba)-i yaritsü ta amanga liasü, ta ashi.
“Netaji Bose-i Japan-i pa kümzüktsü makoktsü ta bilem, kechiyong parnoki ‘surrender’ ser liasü,” ta Ray-isa ashi.
Iba onük nung Ray-i India sorkar dang Renkiji tekülem kidang aliba Bose indang mitsüji DNA test agitsü mepishiogo.
“Pa tayimtsü tsükokba lendong nung asü, ta kuli aika liaka asenoki ano mapang kobika ibaji magizüktettsü. Habibur Rehman densema nisung 6-7 kuli lir. Kokra Renkiji tekülem kidang aliba mitsüji DNA test agitsüla aser mitsüji India-i meyipa bener arutsüla,” ta Ashish Ray-isa shisem.