Netangyahu-i Jerusalem Holy Site nung tensa azüoktsü meranger

Nübur sübotsü asemba Israel police ketdangser aser Israel mitkartemi West Bank kübok Ramallah nung longkak aita raratepdang yiruba Palestine senso ka apuba noksa nung angur. (Ramallah, October 08)

Jerusalem, October 08 (Agencies): Israel aser Palestine na tsüngda tensa mejungi kümdaktsütsüsa tawa lendong atalokdak, Jerusalem holy site mesemdangtsü tetuyuba ka Israel Ato Kilonser, Benjamin Netayahu-i par cabinet ministertem nem tanü Brehostibar nü agütsüogo.

Tan tesüsa ataloka tanü, Brehostibar nüa Palestine nunger kati Jewish seminary kaketshir ka Jerusalem yimti nung tanü kotari agi yirutsüba sülen police-i amaksangji pua aliba osang jangjaogo.

Taoba hopta nungi tenzüka yashi tashi nung Jerusalem aser Israel-i agia aliba West Bank na nung prangpong injang aser kotari abenertemi Israel senso 4 tashi tepsetba, Palestine nunger 2 injang agi kasetba aser nisung aika yiruja tensa mejungi kümdaktsüba osang bushiteta lir.

Aji oda, Islam tamangba yimsü benshirtemi par temeshi kümlemküjadak 3 buba aser Israel’er Yihuda nungertemia laishiba mapang renemba tekülemdak ta züngshidak, Jerusalem kübok al Aqsa mosque tentetdak lendong atalokba ajanga tensa mejungi kümdaktsübaren azüoktsü nükjidong nung Netanyahu-i Germany semdangtsü sentonga yashi, Bodbar nü thinentsüsa akümba osang jangjaogo.

Tan lendong ataloktsü tenzükba sülen par linük ana tsüngda tongpanga raratsüsa tensa mejungi akümba sülen par Palestine aser Israel na tsüngda taoba mapang ama tongpang raratsü memulungba olen ka Palestine Tir, Mahmoud Abbas-ia metetdakja lir.

Ano külen, 2014 küm agiba sülenbo tanü tashi yimjung nung alitsü senden ken danga mamenba Palestine aser Israel napronglai aremzüktepa tensa azüoktsü maparen amalitepa inyaktsü tajungshiba olen ka US Deputy National Security Advisor, Ben Rhodes-ia metetdaktsüogo.