Netanyahu den ajuruteptsü memulunger: Hamdallah

Gaza Strip, May 24 (Agencies): Palestine Ato Kilonser, Rami Hamdallah-i Israel Ato Kilonser, Benjamin Netanyahu den tsüngdong ajurutepa senden amentsü memulungba olen ka tanü, Mongolbar nü metetdaktsüogo.

France-i ayonger külen, Israel aser Palestine na tsüngda tanaben yimjung senden amentsü asoshi France Tir, Francois Hollande-i onük benok saka France medeni Hamdallah den tsüngdong ajuruteptsü bilemba olen ka Netanyahu-i yashi, Hombar nü metetdakja liasü.

Israel aser Palestine na tsüngda tanaben yimjung senden amentsü ajungshitsü nükjidong nung Israel aser Palestine na tan hopta semdangsang, France Ato Kilonser, Manuel Valls den ajurutepba sülen Hamdallah-i France medeni Netanyahu den ajuruteptsü memulungba olenji metetdaktsü.

“Netanyahu-i mapang atsünglangtsütsü nükjidong nung Palestine den tsüngdong ajuruteptsü osangji sangoktsür lir. Ajisüaka, pai alima tashi abenba linüktem nungi mejenbotsü,” ta Hamdallah-i ashi.

Taruba june ita 3 nü nungi tenzüka alima linük balala nungi foreign minister-temi senden amenba sülen parnoki aroki lungjemer Israel aser Palestine lenirtem den telotkep senden amentsü asoshi France-i onük benoka lir.

US-i ayonger külen Israel aser Palestine na tsüngda 2014 küm April ita yimjung senden ka amen saka iba senden amajok nung tembanga liasü