Netanyahu-i Germany Chancellor, Merkel den taruba hopta ajuruteptsü

Berlin, October 02 (Agencies): Israel Ato Kilonser, Benjamin Netanyahu-i Germany yimtiba, Berlin taurba hopta semdanga Germany Chancellor, Angela Merkel den ajuruteptsü sentong renemogo.

Par linük anati kümshi ayonga agiba linük ana indang cabinet senden amentsü nükjidong nung Netanyahu-i taruba Brehostibar nü Merkel den ajuruteptsü sentong ya renemer lir.

Par cabinet minister-tem den külemi 6 buba linük ana indang cabinet senden amenba jakdang, Netanyahu o Merkel nati jurila senden ka amentsü sentong renema lir.

Tan Israel lenirtem den amentsü ayongba plenary senden ya Germany linüki India aser China na densema, alima nung tentetba linüktem rong nung teshimtet linük kar den dang amenba osang bushiteta lir.

Europe nung tentetba linüktem rong nung Israel linük pusemba linük, Germany aser Israel na tsüngda tawa tesendaktep mejungi akümba osanga bushitetogo.

Germany densema alima tashi abenba linüktemi küm 13 tejaklen nungi tenzüka benokba nuclear tezüngzüktep Iran linük den agibaren Netanyahu aser pai aniba Israel sorkari kanga sashia anema lir aser ibaji ajanaga par Israel o Germany linük na tsüngda toaba mapang amabo tesendaktep junga meyutettsüsa tang tensa ajurua lir.

Ano külen, West linük lenirtem den külemi pusema Merkel-ia Israel-i Palestine kübok West Bank nung nübur alitsü ki o jen renemba maparen aija lir.