Netanyahu-i Russia Tir, Putin den Moscow nung ajurutepogo

Moscow, September 21 (Agencies): Israel Ato Kilonser, Benjamin Netanyahu-i tanü Hombar nü Moscow tonga oa Russia Tir, Vladimir Putin den ajurutepba osang jangjaogo.
Russia-i Syria Tir, Bashar al-Assad pusemba Hezbollah telok nem tongpang nung amshitsü osettsüset agüja yariba den külemi, par mitkartem tsüngdong yoka Syria nung tongpang raradaktsüba den sentakba tebilemtsü khuret benoka jembitsü nükjidong nung Netanyahu-i tan Russia semdanger lir.
Netanyahu-i par defence chief of staff, Lt. Gen Gadi Eizenkot aser military intelligence lenisang, Maj Gen Herzl Halevi na anisemer Russia semdangba ajanga Israel-i Russia den onük benoktsü renembaji kanga dang tongtipang ta züngokba kuli angur.
Aji oda, Netanyahu-i tanü Moscow yimti tonga aoba sülen par Israel aser Russia mitkartem na tsüngda Middle East nung tongpang meraradaktsütsü alizüng ayuba olen ka Putin den lemsatepa liasü.
Ajisüaka, tang Syria nung yuja aliba Russia mitkartemi kechisarena ajunga tali kümdanga inyaktsü terenemshiba agia aliba olen ka Putin-ia tanü metetdaktsü.
“Syria dak tesem ana-asem nung tongpang raratsü tashi mali anungji, Syria aser Iran na tsüngda Syria arrtsülen, Golan Heights nung tongpang raratsü aser ibaji ajanga Israel nem tensa tamajung bener arutsütsüsa kodanga mataloktsü,” ta Putin-i Israel lenisang indang temulungjang anisüngzükja ashi.
Armoured vehicles aser Sukhoi SU-27 fighter jet tayimtsü 4 densema Russia-i par tongpang nung amshitsü osettsüset aser mitkar züngsemtem Syria-i tsüngdong yoka Syria tzüyimkümlen, Latakia yimti nung mitkar tesep ka tentettsü tenzükba mapang ka nung Netanyahu-i tan Russia semdanger lir.