Netanyahu-i UN ambassador tasenba inyaktsü asoshi Danon shimoker

Jerusalem, August 14 (Agencies): Israel linük indang United Nations (UN) ambassador tasenba inyaktsü asoshi Israel Ato Kilonser, Benjamin Netanyahu-i par parliament züngsem ka tanü Hokolbar nü shimokogo.

“Israel’er UN ambassador inyaktsü asoshi taoba mapang deputy defense minister inyaksang aser tang Science & Space Minister menden abensang, Danny Danon ozü Ato Kilonser, Netanyahu-i tanü shimokogo,” ta Ato Kilonser office-i tanü sangdong ka ajanga metetdaktsü.

“UN ya alima ajunga nung tongti sabang ka lir aser ozü ambassador tasenba, Danon-i Israel den sentakba ochi o takok ngua alima sabang nung benoka jembitsütsü ta pa dak tamang akar,” ta Netanyahu-ia tanü metetdaktsü.

Netanyahu-i Israel’er Brazil ambassador inyaktsü asoshi West Bank nung nisung alitsü ki tentetba mapatong ketdang asüba ketdangser, Dani Dayan-a tawa shimokba osang jangjaogo.

Ano, Netanyahu’er foreign media otongdar, Mark Regev London ambassador kümdaktsütsü asoshi sentong renemba osang ka pa tenüng memetetdaktsütsü nangzükdaktsüba sülen Israel sorkar ketdangser kati tanü metetdaktsüogo.