Netanyahu-i US November ita semdangtsü

Washington, September 12 (Agencies): Israel Ato Kilonser, Benjamin Netanyahu-i United States (US) Tir, Barack Obama den ajuruteptsü nükjidong nung White House taküm November ita semdangtsü sentong renemogo.
“Israel lenisang, Netanyahu-i ozü US semdangtsü anogoji tanü tashi lateta mali saka kasaji tekaraba mapang nung renemtsü asoshi maparen tenzüka lir,” ta White House Press Secretary, Josh Earnest-i tanü metetdaktsü.
US densema, alima tashi abenba linüktemi Iran den nuclear tezüngzüktep agiba ken o nung ajemdaker Israel o US na tsüngda tang tesendaktep mejungi alia osang bushiteta lir.
Netanyahu-i taküm March ita US semdanga Congress senden nung o jembidang, US-i Iran den nuclear tezüngzüktep magitsü ajungshiba ajanga Washington kanga jashidaktsüba osanga jangjaogo.
“Ozü lenisang, Obama-i Netanyahu den sensaksema mapang indokba amabo alima ajunga nung lenir ka den danga senden mena mali,” ta shia, par US o Israel na tsüngda tesendaktep tanaben tajungba küma yanglushitsü alizüng ayuba olen ka Earnest-i metetdaktsüogo.
Ano külen, alima tashi abenba linüktem aser Iran na tsüngda agiba nuclear tezüngzüktep magizüktsü telemtetba ka US Senate nung Democrat yimsüsürtemi tan Brehostibar nü agiba osanga jangjaogo.
US, Britain, France, China aser Russia nunger den külemi, Germany densemba P5+1 ta ajaba telok aser Iran nati nuclear tezüngzüktep taküm July ita 14 nü agiba sülen Iran-i par nuclear maparen taruba küm 10 asoshi anenba melena alima tashi abenba linüktemia Iran anema benokba tenokdangba sentongtem agientsü nangzüktepa lir.