Netflix superhero film ka nung Priyanka Chopra shilem agitsü

Luroi/August 22, 2019 (Agencies): Actor Priyanka Chopra-i taruba Hollywood project indang metetdaktsüogo. La Netflix atema tanurtem superhero movie ka nung shilem agitsü. Iba film nung la Alita: Battle Angel film yanglur Robert Rodriguez den shilem agitsü, shibai iba film otsü züluba den produce asütsü aser direct-a asütsü.
Hollywood Reporter sangdong ka ajanga ashiba agi, iba film nüngja ya We Can Be Heroes ta agütsüogo. Film ya alien invaders temi alima amakba indang ka asütsü, shirnoki alima nung aliba superheroes tem pur aoer aser item super hero chirnurtemi tsürapur aser alima kümzüktsü asoshi longjemba indang asütsü. Film nung Priyanka-i Ms. Gradenko indang shilem agitsü.
Netflix-ia iba film indang osang jangjashitsüogo aser film nung shilem agitsüpurtem metetdaktsüogo. Film nung Christian Slater, YaYa Gosselin, Akira Akbar, Andrew Diaz, Andy Walken, Boyd Holbrook, Hala Finley, Isaiah Russell-Bailey, Lotus Blossom, Lyon Daniels, Nathan Blair, Sung Kang, Vivien Lyra Blair, Adriana Barraza, Christopher McDonald aser Pedro Pascal nungeri shilem agitsü.
Priyanka tatemsa Rebel Wilson-i tongti shilem agiba “Isn’t It Romantic” film nung shilem agiogo koba February ita Netflix nung sayaogo aser US nung theater tem nunga sayaogo. Kasa mapang nung la The Sky Is Pink film ajungketba nung yakta shilem agi tenzüktsü koba October 11 nü sayatsü aser Toronto International Film Festival nunga screen asütsü. La ano Mindy Kaling den Hollywood film ka nung shilem agitsü lir.
Priyanka-i Twitter nung ‘Jai Hind’ ta zülutsüba dak sendakba nung Pakistan nunger fan kati la aitsüba sülen osang balala nung la kanga bulua adokogo. La UNICEF goodwill ambassador ka ser nung lai India Army pusemba atema Pakistan tsürla yagi la aitsü. Tang Pakistan Human Rights Minister Shireen Mazari-ia UNICEF dang actor ya peace ambassador ka ama shima aliba nungi agintsü asoshi züluogo, kechiyong lai India sorkari Kashmir dak sendakba nung telemtetba agiba pusemogo.
Maneni la tawa kinungbo Nick Jonas den mapang aben adokba nguogo shiba alima sema ken tena senzüba mapang ka lir. La Miami nung Happiness Begins concert nung Jonas’er kibong ajunga aser tetsü Madhu Chopra-o tenu Siddharth Chopra na den kentenba sentong nung adenba nguogo.