Netherlands & Italy nati UNSC menden aroki abentsü lemteter

United Nations, June 29 (Agencies): Netherlands aser Italy nati aroki United Nations Security Council (UNSC) menden taruba küm 2 tashi abentsü telemtetba agiogo.
UNSC nung züngsemtsü vote bendentsü sentong 5 ben tashi agia linük anapronglai vote 95 ngua kasa jenjang ajangzükba yong par linük anati Western Europe & Others Group atema lemzüktsüba UNSC mendenji aroki abentsü lemteta liasü.
“Telungjem tali alitsü, mangatettepbaren bentettsütsü, terenlok alitsü mapatong tali inyaktsü aser Europe ajungai lungjema alitsü nungdaka aliba mapang ka nung ozü linük anati UNSC mendenji aroki abentsü renemer lir,” ta Netherlands Foreign Minister, Bert Koenders-i osang jangjashitsü.
“Tan ozü linük anati UNSC menden aroki abentsü lemtetba ajanga alima ajunga talisa, Europe dang lungjema alitsü osang sangdonger,” ta Italy Foreign Minister, Paolo Gentiloni-ia metetdaktsü.
UNSC menden aroki abentsü lemtetba sülen Italy linüki UNSC mendenji taruba küm, 2017 abentsü aser Netherlands-i 2018 küm UNSC mendenji abentsü renemogo.
Tan Netherlands aser Italy nati UNSC menden aroki abentsü lemtetba ya tan mezüngsüa iba amala telemtetba agir masü kechiyong tesüiba mapang, 1960 nunga vote bendentsü sentong 52 ben tashi agiba sülen kasa jenjang ajangzükba yong Poland aser Turkey natia UNSC menden aroki abentsü lemteta liasü.
Ano külen, tan Netherlands aser Italy nati UNSC menden abentsü jenjang anguba den külemi, Boloivia, Ethiopia, Kazakhstan aser Sweden linüktemia UNSC menden abentsü temeten nguogo.
“Tan UNSC menden abentsü temeten angur Europe linüktemi European Union (EU) tali lungjema alitsü khuret benoktsüla kechiyong Britain-i EU toktsütsü lemtetba sülen EU-i tebilemtsü khuret tulu benoka lir,” ta Sweden Foreign Minister, Margot Wallstrom-ia metetdaktsü.
Ano, lar Sweden linüki UNSC züngsem ama, tongpang rarabaren anentsütsü, yimjung lidaktsütsü aser alima tali tatsükba akümba azüoktsü mapatong tongtipangsüa inyaktsü renemba osang ka lai lemsatep.
Israel aser Palestine nati ajurua aliba mangatettepbaren bentettsütsü aser tawa Colombia sorkar aser sorkar anemer FARC telok na tsüngda agiba yimjung tezüngzüktep mapa küma inyakdaktsütsü alizüng Bolivia-i UNSC züngsem ama ayuba olen ka Bolivia’er UN Ambassador, Sacha Llorenti-ia metetdakja liasü.
Kazakhstan-ia UNSC-i tenzükba yimjung aser terenlok alitsü mapatong ajunga takok ngudaktsütsüsa inyaktsü renemba osang ka Kazakhstan Foreign Minister, Erlan Idrissov-ia sangoktsü.
Tan UNSC menden abentsü temeten anguba linüktemi sangküm, 2018 küm January ita 1 nü nungi tenzüka Angola, Malaysia, New Zealand, Spain aser Venezuela linüktem melenzüka UNSC mapatong ajunga UNSC nung teti asoshi züngsemba linük 5, China, France, Russia, Britain aser US den aroki lungjemer inyaktsü.