Netherlands nung cycle App ka yanglutetogo

June 24, 2017 (Agencies): Tanurtem bicycle anishiba nung lendong ajuruba tali akümba nokdangtsü asoshi Netherland nung phone company kati tanurtem cycle aniba mapang nung text asüba soittsü asoshi tasa ka asadar.
Iba dak sendakba nung phone company KPN-i app tasen ka yangluogo aser iba ajanga cycle anishirtem cycle aniba mapang internet aser phone signal nokdangtsü.
“Iba sentong ya tanurtem dang cycle aniba mapang phone amshitsübaji tim masü aser iba ajanga lendong bener arutsür ta sayutsüba atema tenzük. Iba maparen ana ya khenyongi meputep,” ta KPN otongdar Victorina de Boer-i ashi.
Netherland nung cycle senzütsü asoshi lane aika yanglua lir aser tanurtem timbaka school-i oli aruli ta cycle ajanga dang senzür. Ajisüaka 2015 küm cycle accident asüba pongu nung kabo tanurtem phone amshiba ajanga atalokba lir. Iba amala accident nung 2015 küm tanur 12 asü aser 441 yirua liasü, ta Dutch Traffic Safety Association ajanga metetdaktsü.
Tawa KPN-i bushisüngdang nung ngutetba agi, cycle tanidak nung lendongji text asüba kicha masü saka tanur arishi küm 12 nungi 18 tashi nung alirtem parnok cycle aniba mapang WhatsApp, Snapchat aser Instagram nung message arudang phone vibrate asüba ajanga parnok mela-mela distract asür.
Traffic body-i iba system ya yanglutsüba atema KPN den longjemogo. Iba system ajanga bike unlock süteter aser kasa mapang nung cycle anisang phone den communicate süteter.
Auer ket nungi kümzüktsü asoshi Netherland nung bicycle tem yimya agi jabi ajanga dang shibanger aser lapoker. Iba mobile app ajanga cycle lapokba sülen KPN dangi signal ka yoker.
Cycle nung tua amenba sülen iba app ajanga emergency number 112 dak alaka internet aser phone signal ajak shibangtsür.
“Cycle anirtemi parnok anener app amshia cycle lock asüba sülen parnoki phone maneni jung junga dang amshitettsü,” ta de Boer-i ashiba den külemi laisa ashiba agi, iba app ya tendangogo aser Android phone tem atema mezüng euro 100 shi yong ayoktsü.