Netherlands nung tenlaki aika mamshir

Amsterdam, Chiteni/July 10 (Agencies): Netherlands nung aliba tekülem ki shilem pongu bo tekülem ki asoshi mamshir, ta Dutch osangkaket ka ajanga research agiba nung ngutet.
Akhi mapang nungi Khristan linük ka süaka 19 century mapang nütsüng yongsük shilem 60 Protestant liasü, saka Holland nung iba sülen tamangba tsütsü ajema aküm.
Trouw osangkaket ajanga research agiba nung tekülem ki aika nisung aliba ki, office aser library amshir mesüra tanga lokti senten aser sobaliba sentongtem agiba tesem dangi melenba bushitet. Register süa aliba tekülem ki 6,900 nungi tekülem ki 1,400 bo tamangba yimsü masüba maparen nung amshir.
Catholic nunger indang tekülem ki ya temeshi tesem ka ama züngshir, anungji parnok indang tekülem ki bo tamangba yimsü dak sendakba maparen masüba nung kangabo mamshir.
“Roman Catholic purtem asoshi tekülem ki ya kangadang temeshi lir, Protestant atema tekülem ki ya tanga maparen nunga amshiteter. Anungji Roman Catholic nungertemi parnok indang tekülem ki tanga maparen atema amshidaktsütsü tali nungnanger,” ta research agirtemi bushitetba Premier News UK ajanga ashi.
1800 küm sülen yangluba Protestant tenlaki 3,000 shi nungi 850 shi Khristanpur sentongtem atema mamshir, aser kasa mapang Catholic nunger tenlaki 1,500 yangluba nungi 280 shi dang yimsü asoshi mamshir.
2017 küm Statistics Netherlands ajanga social cohesion and wellbeing indang report ka ajanga ashiba agi, Dutch nunger nütsüng timbaka tamangba yimsü kata nunga mamangba indang bushitet.
Tekülem kidangi aortema kanga ajema kümogo. 1971 küm nütsüng yongsük shilem 37 tekülem kidangi teti oa liasü, saka 2017 kümbo shilem 16 dang aküm.