Neutral Flag kübok tokteptsü Russian Olympic Committee-i melunger

Moscow, December 12 (Agencies): National team nungi shilem agitsü nokdangaka asayartemi 2018 Winter Olympics nung ‘neutral flag’ kübok shilem agitsü asoshi Russian Olympic Committee (ROC)-i Mongulbarnü melungogo.
“Onok ajak tebilemba kasa dang: asen linük nungi asayartem South Korea-i oa Russia asoshi takok bener arutsü asoshi merangtsüla. Russia nunger athlete temi iba asayamung nung shilem agitsü asoshi jangraba shiogo,” ya IOC nungi anenja alisang, ROC tir Alexander Zhukov-i Moscow nung osangbener senden ka nung ashi.
ROC-i asayar ajunga akhümtsübutsü. Iba asayamung nung shilem agitsüpurtem aser magitsüpurtem ajunga nem ROC-i saisapong dak sendakba teyari ajunga agütsütsü, ta Zhukov-i ashi.
2014 Sochi Winter Olympics nung sorkari yaria tajungba nung asayatettsü mechi mozü agütsü, ta aija taruba küm February 9-25 nung asayatsü aliba 2018 Winter Olympics nung Russia nungi shilem magitsü asoshi International Olympic Committee (IOC)-i taoba hopta telemtetba agi.
Tasüngtet Russia nunger asayartemi Olympic indang wako kübok asayatsü asoshi melatsü, ta IOC-i ashi.
“Olympic Athletes from Russia” tenüng amer iba asayamung nung shilem agitsü asoshi Russia nunger asayartem nem kechi jenjang lemzüktsütsü, ta jembishinütsü asoshi Russian Olympic Committee nung ketdanger kar Lausanne, Switzerland-i December 15 nung aotsü, ta Zhukov-i ashi.
Pyeongchang, South Korea nung Russia nunger asayar 200 shi oa shilem agitsü akok, ta pai shisem.
Olympic wako kübok Russia nunger asayartemi tokteptsü ya maksü asütsü, ta Russia Tir Vladimir Putin-i October ita shia lir.
Saka IOC-i telemtetba agiba sülen pai nokdaka aliba melenshia, Russia-i iba asayamung menokdangtsü aser asayartem iba asayamung nung shilem agitsü jangrartem menokdangtsü, ta ashi.