Neutrino Scientist 2-i 2015 Physics Nobel Prize agizüker

Nobel Assembly züngsemtem, (Abelen nungi achijileni tarensena) Professor Anne L’Huillir, Professor Goran K. Hansson aser Professor Olga Botner nungeri Stockholm yimti nung osangbener den tanü Mongolbar nü ajurutepba noksa nung angur. Physhics shilem nung 2015 Nobel Prize agizüker ana, Japan nunger Takaaki Kajita aser Canada nunger Arthur B. McDonald na indang noksa parnok tesülen maloka aliba noksa nungsa angur. (Stockholm, October 06)

Stockholm, October 06 (Agencies): Japan nunger Takaaki Kajita aser Canada nunger Arthur B. McDonald nati Physics shilem indang 2015 Nobel Prize tanü Mongolbar nü agizükogo.

Kajita aser McDonald nati ‘neutrino oscillations’ ta ajaba neutriono seret odangtetba osang bushitetba nüngtem nung tena nem iba nungtugu sempet agütsüba osang jangjaogo.

“University of Tokyo nung research agir, Kajita aser Canada kübok Queen’s University nung scientist, McDonald nati photons sülenbo alima nung timba anguba oset, neutrio seret odangteter ta tan bushitetba ajanga alima indang tangatetba melenshidaktsüogo,” ta Nobel Assembly züngsem, Anne L’Huillier-i metetdaktsü.

Par teloki yashi Hombar nüa medicine shilem nung Ireland, Japan aser China nungi scientist 3 nem 2015 Nobel Prize sempet agtüsüba osang sangokja liasü.

Ireland nunger William Campell aser Japan nunger Satoshi Omura nati roundworm mesen ajanga adokdaktsüba tashidak aneptsütsü mozü bushitetba aser China nunger Tu Youyou-i ramen tashidak agi nisung asübaren ajemtsütsüsa mozü tasen bushitetba nüngtem nung par asem nem medicine shilem indang Nobel Prize agüja liasü.

Medicine, physics, chemistry, literature, peace aser economics shilem nung tangar dak alia inyaktertem kümshi shimteta Nobel Prize ya agütsür.

Taküm Physics shilem nung Nobel Prize agizüker anati sadanga agitsü asoshi tena nem dollar sen 963,000 senpet agütsüba den külemi, tenaprongal nem medal aser kulikaketa agütsütsü renema lir.

Kümshi Nobel Prize agütsütsü asoshi nisung shimtetba osangji October ita alima dang sangoktsür saka senpet aser sempettembo Sweden kübok Stockholm yimti aser Norway kübok Oslo yimti na nung December ita tetenzüklen sentong tajung agia agütsür.