New Chumukedima nung DMC indang truck gari den mapa inyakertem apu

Dimapur, December 20 (TYO) : December 20 nü New Chumukedima nung Highway anasa Cesspool jana endoka lia Dimapur Municipal Council indang Cesspool truck gari ka den driver aser mapa inyaker asem New Chumukedima Youth Society-i apu, ta sangdong ka nung metetdaktsü.
DMC nung mapa inyakertemji Medziphema Police Station ket nung agütsüogo, ta sangdong nungsa shia lir.
Tesüiba mapang New Chumukedima Village Council aser Youth Society nati Chathe ayong nung jana aser shiruru tasütem meindoktsü atema tetuyuba agütsüogo. Ajisüaka, shiruru shishilembartemi an, ak amala tasütem ayong anasa endoker aser iba nungi teshinem adokba ajanga temeket alirtem aser süisobongertem kanga timtem ajurur, ta New Chümoukedima Village Youth Society (NCVYS), Dolhoubeizo Hama-i sangdong nung shia lir.
Iba ama timtem agütsüba inyakyim nokdanger aser aibelenertem tapet temerenshi alitsü. New Chumukedima lanurtemi maneni nüka mittsü aser public-ia ibala inyakyim angudang osang sangoktsütsü mepishir, ta NCVYS President-isa ashi.
Municipality kaji loktiliba nung merükmeju mapa inyaktsü atema lemzükja lir saka iba ama mapa inyakba angudang kanga aoksar aser sasar, ta paisa shisem.