New Delhi Marathon : Gopi aser Athare nati takok angu

New Delhi, February 26 (Agencies) : Deobarnü 2buba IDBI Federal Life Insurance New Delhi Marathon asempetba nung Rio Olympic nung shilem agir Thanackal Gopi aser Monika Athare nati tebur aser tetsür telemsa nung takok angu.
Gopi-i iba marathon rangben, kilometre 42.195, gondha 2 ser minute 15 ser second 37 nung asemzük.
Gopi ya Army Sports Institute, Pune nungi lir aser pai Rio Olympics nung marathon asemtepdang mapang 2:15:25 agiba ajanga London nung August ita akatsü aliba World Athletics Championships nung shilem agitsü shimteta lir.
Iba asemtepba nung tanabuba aser tasembuba jenjang nung takok angurtemia World Championships nung shilem agitsü nüngdakba mapang 2:19.00 tekübok agia liasü.
Army Sports Institute, Pune nungisa Bahadur Singh Dhoni-i mapang 2:16:09 agia tanabuba jenjang nung tembang aser T H Sanjith-i mapang 2:17:20 agia tasembuba jenjang ngutet.
Tetsür rongnung Nashik nungi Monika Athare-i iba marathon mapang 2:39:08 agia asemzük. Ibai la asoshi mezüngbuba takok lir. Lai iba asemtepba kanga temulung lema tenzük aser tetenzük nungi la tamaser asema zübazüba takok angu.
Tetsürtem World Championships nung shilem agitsü atema mapang 2:45.00 nung asemzükertem shimer aser lai iba mapang tasazük tekübok asemzükba ajanga la-a shilem agitsü pur rongnung shimokogo.
Athare sülen Jyoti Gawate-i 2:53:48 nung aser Ranjan Kumari-i 3:08:04 agia tenati tanabuba aser tasembuba jenjangtem nung takok angu.
New Delhi Marathon ya India nunger Cricket asayar mongin Sachin Tendulkar aser Ethiopia nungi nüngtugu asemteper Haile Gebrselassie nati tenzüktsü.
Iba asemtepba nung takok aguba sülen Gopi-i, “Iba takok anguba asoshi ni kanga pelar. Asemtep tenzükli nungi kilometre 25 tashi Dhoni küna külemi asema liasü. 2017 küm asoshi ibai ni atema mezüngbuba marathon lir aser tia kaa ni takok nguogo,” ta ashi.
“Ni June ita Ranchi nung akatsü aliba Asian Championships aser London nung akatsü aliba World Championships naprong nung asemtsü,” ta pai shisem.
Marathon asemtepba nung tan mezüng takok angula Monika Athare-i, “Full marathon nung ni shilem agibaji tan mezüng aser iba nung takok anguba ya ni asoshi takok kanga tulu lir. Ni mapang 2:40 kübok asemzükba atema kanga pelar,” ta ashi.
Tanga asemtepba nung takok angurtem yamai:-
Half Marathon Men: G Lakshamanan (1:04:29); Man Singh (1:04:39); Kheta Ram (1:06:15).
Half Marathon Women: Manju Yadav (1:21:02); Arpita Saini (1:25:34); Neetu Singh (1:27:11).
10K Run Men: Mohan Saini (31:08); Dinesh Kumar Bind (31:17); Somong Raman (31:17).
10K Run Women: Reeta Bisht (42:13); Jayanti Thapliyal (42:35); Nikki Rai (45:22).