New Delhi nung ‘Destination North East-2016’ benjung amungtsü

New Delhi, January 8 (Agencies) : February 12-14, 2016 tashi New Delhi nung ‘Destination North East-2016’ sentong alitsü ta Union Minister of State (Independent Charge) Development of North-Eastern Region (DoNER), MoS PMO, Personnel, Public Grievances & Pensions, Atomic Energy and Space Dr Jitendra Singh-i metetdaktsü.
Linük jenjang nung North East Region indang rongsenren, loktiliba aser sobaliba sayutsü atema iba sentong ayongzüker.
Tawa Ministry of Development of North Eastern Region (MDoNER) Calendar-2016 sayaba sentong ka nung Dr. Jitendra-i iba osang metetdakja liasü.
India aser north east tali sendakteptsü aser India nung tanüngba tesemtemi north east talia meteta kümdaktsütsü nükjidong nung iba sentong ayongzüker, ta pai ashi.
Taküm küm tatemlen tashi nung Ministry-i north east jenjang tajungba kümdaktsütsü aser MDoNER-isa north east nung Public Private partnership jenjang ajungkettsü atema mapa inyaker, ta Minister Dr. Jitendra-isa shisem.
Paisa, ‘North-East Road Sector Development Scheme’ (NERSDS) indang osang metetdaktsüdang ashiba agi, iba ya North east atema road construction agency ka asütsü aser iba telok yagi inter-State lenmangtem dak rangloka mapa inyaktsü.
Iba dak sendakba nung mezüngbuba Inter-Ministerial Committee senden ka agiogo aser iba nung inter-State lenmang 5 nem senotsü teyari agüja yanglutsü telemtetba agi.
Lenmang punguji – Daimukh-Harmuti Road (Arunachal Pradesh & Assam), Tura-Mankachar Road (Assam), Assam portion of Sherkhan-Bagha Bazar Road, Wokha-Merapani-Golaghat Road (Nagaland) aser Assam & Jamai-Taning Road (Manipur) lir.
NERSDS ajanga inyakba mapatongtem atema National Highway Infrastructure Development Corporation Ltd. (NHIDCL)-i ketdangsüa inyaktsü, ta Dr Jitendra-isa metetdaktsü.
‘Destination North East-2016’ Festival nung Tourism, Agriculture, Food Processing, Skill Development &Entrepreneurship, IT, Handloom & Handicrafts, Livelihood, Micro-Finance aser Start ups nunger alitsü. Ano ‘North Eastern cuisines’ ta ser chiyuntgtsü indang stall tem lapoktsü.
Ministry of DoNER-i adokba Calendar 2016 nung North Eastern Region kübok state shia nung tang teinyakdak mapatong indang noksatem enoka lir.
Noksa 12 rongnung Mizoram, Nagaland, Sikkim nungi anana aser Assam, Manipur, Meghalaya, Tripura, Arunachal Pradesh o Delhi nungi kaka lir.