New Delhi nung NSUD-i T.R.Zeliang nem tenüngsang agütsü

Dimapur, April 25 (TYO) : April 23, 2016 nü Nagaland Chief Minister, T.R. Zeliang-i Lifetime Achievement Award atema Hombarnü Naga Students Union Delhi (NSUD)-i pa nem tenüngsang agütsüogo.
Tanü NSUD-i Nagaland House, New Delhi nung TR Zeliang nem tenüngsang agütsüba sentongji ayongzüka agi aser iba sentong nung Delhi nung alir Naga nunger aika aden, ta Media Cell, Chief Minster’s Office Nagaland sangdong ka nung metetdaktsü.
Lifetime Achievement Award angurtem rongnung TR Zeliang tasembuba lir aser iba sempet ka Global Leadership Award nung shilem khenyongi balaka lir, ta sangdong nungsa shia lir.
Taoba mapang Kellog School of Management, North Western University, USA nung Prof. Philip Kotler aser People’s Consultative Assembly of the Republic of Indonesia Vice Chairman, Dr. (H.C) Oesman Sapta nati iba sempet agizüka liasü.
Tanü sentong nung TR Zeliang-i kaketshirtem dang tebilemtsü khuret abentsü, nendaka aser meranga inyaktsü tayongzükba agütsü aser NSUD-i iba sentong ayongzükba atema pelaba metetdaktsü.
Iba sentong nung Principal Resident Commissioner, Joint Resident Commissioner, Deputy Resident Commissioner, Advocate General of Nagaland, Ricky Med, pastor aser tanga lennirtem aika aden, ta Media Cell sangdong nungsa metetdaktsü.