New Delhi nung tanur ki malirtemi osangkaket adoker

New Delhi, April 15 (Agencies) : Osangkaket aika nung mapang shia India yimtiba New Delhi nung lenmang tezülen aliba tanurtem okrongba indang osang adoker, ajisüaka ki malir parnok tanur telok kati ita shia adokba osangkaket ka adoka parnok okrongba aser nüngdakba osang proker.
‘Tanurtem ola’ (Balaknama) osangkaket ya tanur arishi küm 19 tsüngda puri zülua adoker aser nisung 10,000 shi-i azünger.
Sensakpu aser mapang matong dang nungi aayangba, mapang metemsüi kibong akümba, shi jangraba mapa inyakba den drugs amshi tenzükba osang ajak iba osangkaket nung adoker. Balaknama osangkaket atema osang kodanga mepiri-i ang mali.
“Kodang otsü shimtsü atema osang zülurtem sendena amener, aiben mangatettep adoka rarateper kechiba süra otsü ajak agi nüburtem dang kongshitsüsa tajung dang asüba yong koba anga meshimteti akümer,” ta Balaknama Yimozülur Shanno-i ashi.
State balala nung iba osangkaket atema osangbener parnok nisung 70 lir. Parnok rongnung nisung 14-i linük yimtiba, New Delhi nung atalokba osang maneni agütsür. Balaknama nung osang zülurtem, editor tem aser manager tem ajak talidak ki makartem dang lir.
“Ni meshimetsüa, drugs chia aser jana shitena jajar ka liasü. Idangji ni Balaknama osangkaket indang angashia yangji inyaktsü tenzük. Mezüngbo ni osang belener ka ama inyak, iba sülen osangbener küma joko ni Yimozülur akümtsü jenjang tongteta kümogo,” ta Balaknama atema osangbener Jyoti Kumari-i ashi.
Tanurtem tsürabur aika kecha meinyaker aser kaketshisatsü makaba nüburtem lir. Parnok iba osangkaket atema osang abenba ajanga sen angur aser joko parnok aika kaketshisatsü bushidar.
“Ni meinyaktetba mapa ozü jalaibo inyakteter. Lai tangar yariba den onoka yarir,” ta Kumari tetsü Sunita Devi-i ashi.
Tang ita shia adokba, tapak ti aketba osangkaket ya mezüng 2002 küm adokdangbo küm nung pezüben dang adoka liasü. Iba osangkaket atema inyaker tanurtem taküm kanga melenshiogo aser anünga aliba tanur meyirjang aika taküm melenshidaktsütsü parnok nükjidong lir. Iba osangkaket ya NGOs aser nüburtem atema bilemertemi nungita yarir.
“Tangari parnok tenüng asangdang parnok kanga tashi itshir aser ajungmesor. Iba den külemi osangbenertem den mesüra ketdangsertem den parnok chitepa jembishinüba ajanga parnok nem tashi balaka agütsür,” ta Chetna nung director aser Balaknama osangkaket atema sen agi nungita yarisang Sanjay Gupta-i ashi.