New Delhi nung ‘World Book Fair’ tenzükogo

New Delhi, January 07 (Agencies) : Tetsürtemi züluba kakettem dak rangloker anogo toku (9) nü atema ‘World Book Fair’ Pragati Maidan, New Delhi nung tanü, Honibarnü nungi tenzükogo.
Iba sentong Minister of State for Human Resources Development Mahendra Nath Pandey-i lapoktsüba sülen nikongdang nungi nüburtem aitsü maongka lapoktsüogo.
Sentong nung Odisha oshi nung nüngtugu kaket zülur aser Jnanpith Award angula, Pratibha Ray tetushi tejaoker liasü aser India nung European Union atema Ambassador of the Delegation, Tomasz Kozlowski-a tenüng teti jaoker rongnung liasü.
Tanurtem atema shisalen tuyuba, olemtep mapang, otsü shitepba aser workshop balala agitsü sentong renema lir.
Taküm “New Delhi World Book Fair” indang omenji ‘Manushi’ lir aser iba sentong ya tetsürtemi züluba kaket dak rangloker akarba lir. Iba sentong nung alemli mapang nungi tanü asüng tashi tetsürtemi züluba kakettem sayutsü, ta iba sentong ayongba telok, National Book Trust (NBT)-i sangdong ka nung metetdaktsü.
NBT-i parnok küm 60 ajungba nüngtem nung kaket balala ajungkettsür.
Linük aser bendanglen nungi publisher 800 shi iba sentong nung shilem agidar.