New Market FC puri Sechü-Zubza pur kokogo

Kohima, Luroi/August 15 (TYO): Kohima Town Club puri ayongba Kohima Football League-2 tanü asaya nung Gideon Leo-i hat-trick tanabuba agüja pa teyari nung New Market Football Club puri temaba jenjang nung aliba Sechü-Zubza Football Club pur kokogo.
Tanü asaya nung Sechü-Zubza pur goal 5-2 agi akokba sülen New Market FC pur tang jenjang asembuba nung lir.
New Market puri asaya kanga junga tenzük aser minute 3buba nung Gideon Leo (99)-i par telok asoshi mezüngbuba goal idaktsü. Minute 10buba nung Sechü-Zubza puri iba goal küptoktsü asoshi maongka angu saka Petevizo Kezieo (7)-i ball pass asüba Aloumei Panmei (10)-i tekolak agi kangajunga tongoktsü koba New Market goal keeper Sedevituo Seretsu (1)-i nokdanga liasü.
Ajisüaka minute 14buba nung Keduvikho Mekro (4)-i box telung nung handball menaba sülen referee-i Sechü-Zubza pur nem penalty metsütsü asoshi maongka agütsü, koba Kekehrieletuo Tsira (11)-i idaktsü. Iba sülen minute ana lir Sechü-Zubza puri goal tanabuba idaktsür lila saka Kezieo-i cross asüba ball skipper Shürhosül Zhotso-i junga memetsüshi New Market goal keeper-i nokdang.
Asaya nung minute 20 orr Leo-i tanabuba goal idaktsütsü asoshi maongka angu, koba pai cross bar adena metsüdok saka pai minute 29buba nung par telok asoshi tanabuba goal idaktsü. Iba sülen Salu Kulim (14)-i minute 34buba nung goal nungi talangka pilar ball metsüba kangajunga ai. Sechü-Zubza pur play maker Khiuwangbo Kaurintah (8) temang manemba ajanga iba asaya nung shilem magitet aser iba ajanga parnok kangshia liasü. Minute 42buba nung maneni Leo-i goal idaktsütsü asoshi maongka angu saka pai iba maongka magitet aser asaya mezüngbuba shilem goal 3-1 nung tembang.
Lemon break sülen minute asem orr Sechü-Zubza defender Menuosieto Sano (20)-i ball nokdangtsü merangdang own goal ka idaktsü.
Iba sülen minute 66 buba nung Leo-i par telok asoshi goal pongububa aser pa asoshi iba asaya nung goal asembuba idaktsü. Iba ya pa asoshi iba asayamung nung tanabuba hat-trick liasü. Asaya matemtsüngda minute 68buba nung Sechü-Zubza puri tanabuba goal idaktsü, saka iba sülen parnoki tanungba goal meküptokteti asaya tembang.
Iba asaya mekokaka Sechü-Zubza puri tang tashi nung point 20 nugteta parnok temaba jenjang nung lir aser parnok sülen Ziekezou SC (20 point) aser tasembuba nung New Market FC (18 point) lir.
Iba asayamung tembangtsü asoshi ano round ana anunga lir.
Luroi/August 16 nü asaya: United 16 FC Lerie vs Twenty XI, Viswema.