New Market-i, United 16 akok; Leo-i hat-trick agütsü

Kohima, Luroi/August 13 (TYO): Kohima Football League-2 tanü asaya nung Gideon Leo (99)-i iba asayamung nung hat-trick pezübuba agüja New Market Football Club puri United 16 FC Lerie pur kokogo.
Leo-i asaya mezüngbuba shilem nung goal asem agüja New Market FC puri United 16 kokogo. Pai asaya nung mezüngbuba goal minute 3buba nung idaktsü. Asaya nung minute 9 orr United 16 nungi asayar Wanghe (9)-i goal nungi pilar ball kanga junga metsüoktsü saka New Market goal keeper Sedevituo Seretsu (1) kümküma aliba ajanga iba ball nokdangtet.
New Market pur atema kanga tezüdangtsüka defender Longshebemo Tungo (2)-i metsüba penalty United 16 goal keeper Nughato Sumi (81)-i nokdang. Minute 23buba nung defender aser skipper Athuo (2)-i D’box telung nung Rhitsho Mero (10) alangdaktsüba sülen iba penalty ya agütsü.
Ajisüaka iba sülen minute ana orr Leo-i goal tazüng ka nung tanabuba goal metsüoktsü.
Minute 29buba nung Mero-i goal keeper mepaitokteti goal idaktsütsü asoshi maongka tajung ka süidaktsü. Iba sülen minute 32buba nung referee-i skipper Athuo nem asayar yimya shidak mebenshiba atema yellow card ka agütsü.
Asaya nung minute 39buba nung Leo-i goal tasembuba idakja asaya mezüngbuba shilem tembang. Iba goal ajanga pa iba asayamung nung hat-trick agütsür pezübuba kümogo.
Lemon break sülen United 16 puri parnok asaya yimya melenshir asaya saka parnoki goal magütsütet aser parnok asoshi maongka tajungtibaji minute 83buba nung angu koba Jonathan Koso (10)-i cross bar nung tera agi mekongshi metsütok.
Kasa mapang nung New Market puria goal idaktsütsü asoshi maongka nguteta liasü. Minute 49buba nung Menguzelie Rutsa (11)-i metsüba ball aser minute 59buba nung Kethozapu Meru (3) metsüba ball goal keeper-i kanga junga nokdang aser kasa mapang nung Leo-i minute 68 aser 86buba nung ball metsüba goal post nung ondak.
New Market nungi asayar Longshebemo Tungo nem minute 61buba nung yellow card ka agütsü.
Tanü asaya akokba sülen New Market pur jenjang asembubai tuogo. Parnoki tang tashi nung point 15 nguteta lir.
Luroi/August 14 nü asaya yamai alitsü:
1. Khriekesa FC vs Twenty XI FC, Viswema @ 12Noon
2. Vanguard FC Tseminyu vs Ziekezou SC @ 2PM