New Market-i United 16 FC tsükdaktsü

Kohima, September 2 (TYO): Tang tasayadak Kohima Town Club Cup nung tanü asaya koka New Market Football Club pur semi-final tongteter tanabuba telok kümogo.
Tanü asaya nung minute 90 tashi nung aser iba sülen minute 30 apuloktsür asayaba nunga telok katidanga goal kata magütsütetba sülen tie-breaker asayaba nung New Market puri United 16 FC 4-2 agi kokogo.
Ground kanga mejungi lishi nung asayaaka telok anapronglai kanga tashi ita toktepogo saka telok kati danga goal magütsütet. Asayar tenzüker minute trok buba nung Keviselie Sechü-i goal nung ball kangajunga metsüloktsü saka kasaji United 16 pur goal keeper V Puro-ia ball kanga junga nokdanga goal aitsü nungi kümzük.
Iba sülen minute 90 asayaba nung telok kati danga goal idaktsütsüsa maongka meyangluteti asaya tembang. Kasa mapang nung minute 30 buba nung New Market nungi asayar Keviselie nem yellowcard ka agütsü aser ano United 16 nungi asayar Puro aser Ngulie Pochury na nema minute 60buba aser asaya tanabuba shilem mapang apuloktsür asayaba nung yellow card kaka agütsü.
Minute 30 apuloktsür asayaba mapang nunga telok anapronglai goal kata magütsütet, anungji tie-breaker asayatsüsa aküm kong New Market nungi asayar katidanga ball memetsüpeti goal idaktsü saka United 16 nungi asayar parnok pezüi metsüba nung anati metsüpet.
September 4 nü asaya yamai alitsü: Ziekezou SC vs Khriekesa FC @ 2PM