New Market polling station ana nung Election merüka agitet

Kohima, Tsüklai 27 (TYO): 8th Western Angami Assembly Constituency kübok polling station ana- New Market 1 aser New Market 111 polling stations nung “one man, one vote” agüja “Clean Election” campaign nung ayongzükba ama agiogo.
New Market I Polling Station nung vote 768 nungi vote 640 agutsü aser New Market 111 PS nung vote 356 nungi vote 288 agutsü.
New Market Area Panchayat (NMAP) aser New Market Youth Organization (NMYO) züngsemtemi anogo piyong nüka liasü aser tangar melen votes (proxy vote) kata magütsüdaktsü.
New Market polling stations nung polling junga agitetba atema melungsüa NMAP Chairman, Kuotsu-i, ” Election Commission of India (ECI) Representation of Peoples Act 1951 ozüng kübok arishi küm 18 aser temapur ajaki vote agutsütsü temeten lir. Democracy nung pai mesüra lai melungba nisung nem vote agutsütsü temeten lir,” a ashi.
Paisa, iba menden nungi candidate shibai takok ngudir nguaka MLA jagi constituency terenlok mapa inyaktsüla, ta ashi.
Paisa, New Market colony atema tongtibangtiba anaji gari lenmang terenlok aser New Market Area Panchayat hall yanglutsü lir, ta ashi.
New Market area ya state yimtiba, Kohima nung colony tejentem rongnung ka lir, aser nija gari süaka sorkar gari süaka mesüra commercial gari süaka anogoshia gari timbaka iba lenmang süia senzür, anungji iba lenmang terenlok atema kanga rongdak süa inyaktsüla, ta paisa ashi.