New Year mapang Thailand nung nisung 500 jungnüa tsükset

Bangkok, Aenjeti/Jan. 03 (Agencies): Thailand nung Luchii/December 27, 2018 aser Aenjeti/January 02, 2019 tsüngta gari lendong balala nung asür nisung 463 aser yirur 4,000 jungnüa liasü, ta ketdangsertemi ashi.
Iba züngdangba ya taoba küm New Year mapang asüba dang nungi timba lir, kong taoba küm kasa mapang gari lendong nung asür nisung 423 liasü.
Linük tesem balala nung New Year anogo kisüng nunga nisung 89 asü aser 700 dak tali yiru, ta Thailand indang Department of Disaster Prevention and Mitigation (DDPM) ajanga Brihostibarnü sangdong.
Item anogo tenet dang ya parnoki “the seven dangerous days” ta ajar, koba taküm Bodhbarnü tembang, aser item anogo ya küm shia gari lendong tali ajuruba anogotem lir.
New Year mapang temesepba chiyongtsü chia-jemer gari aniba ajanga asür shilem 30 lir, ta DDPM ajanga ashi.
Maneni gari kanga kara aniba ajanga asürtem shilem 30 tera agi majung lir.
Gari lendong ajuruba ya shilem 80 jungnüa motorcycle nung tsükokbatem lir.
World Health Organization (WHO) ajanga Luchii/December 2018 nung sangdongba osang ka nung, Thailand indang lenmang ya alima nung lendong timtiba ajuruba rongnung jenjang tekububa nung lir, ta shia lir.
2015 küm iba linük (Thailand) ya jenjang tanabuba nung züngoka liasü.