New York nung India aser Pakistan Foreign Minister na ajurutsü

New Delhi, Rongjui/September 20 (Agencies): Tan ita tatemlen New York nung UN General Assembly (UNGA) senden aliba mapang nung India aser Pakistan Foreign Minister na ajurutepa jurila senden ka amentsü.
Tanü New Delhi nung osangbenertem den jembidang External Affairs Ministry (MEA) otongdar, Raveesh Kumar-i, “UNGA senden aliba mapang nung foreign minister ana ajuruteptsü. Iba mapang nung jurila senden ka amentsü onoki melungtepogo,” ta metetdaktsü.
“India aser Pakistan permanent missions-i iba senden amentsü atema anogo lemtettsü,” ta paisa metetdaktsü.
Pakistan Ato kilonser, Imran Khan-i shidi ka ajanga India Ato kilonser, Narendra Modi dang linük ana tsüngda asentenshir ken o jembitsü aser UNGA senden aliba mapang nung India Foreign Minister, Sushma Swaraj aser Pakistan Foreign Minister, Shah Mehmood Qureshi na ajurutepdaktsütsü atema mepishiba sülen tang iba osang ya jungkai adoker.
Osangbenertemi asüngdangbatem langzüdang Kumar-i, “Pakistan Ato kilonseri mepishiba nung ajemdaker iba senden amentsü. Tang tashi nungbo iba senden atema junga merenem,” ta metetdaktsü.
Kumar-isa, India-i Islamabad (Pakistan) nung ayonga aliba South Asian Association for Regional Cooperation (Saarc) foreign ministers senden nung adentsü, ta metetdaktsü.
Tawa Pakistan sepaitemi International arrtsülen Border Security Force (BSF) sepai ka tepsetba dak sendakba nung Kumar-i, ibaji taochi makai inyakogo aser BSF-i Pakistan sepaitem dangi shidi ka yokogo, ta metetdaktsü.
“Iba ya ken o tulu ka lir aser onoki Pakistan matsüngdang benokogo,” ta pai ashi.