New Zealand-i tanabuba Test asaya kokogo

Metsüremi/March 2, 2020 (Agencies): India aser New Zealand na tsüngda tanabuba Test asaya Hombarnü NZ-i kokogo. Anogo asembuba nung asaya akoktsü asoshi run 132 nüngdaka asaya tenzük aser NZ team-i iba run ayong ayonga menepa liasü. India-i asaya tatemi wicket ka anabo agiogo saka opener Tom Latham aser Tom Blundell na senteper run 103 yanglua parnok jenjang tajung nung toktsü aser parnoki asaya wicket 7 agi koka series 2-0 agi kokogo.
Tanabuba inning nung India nunger run 124 nung asayar ajak out sütsü. Nikongtsütsü tashi nung run 97 agi timba ser anogo tembangba sülen tasembuba anogo tajungba asayatsü imlaa asaya tenzük saka parnok rongnungi Ravindra Jadeja (run16*, ball 22) kijai tatem tashi junga asayatet.
Asaya tenzüker tasembuba over nung Hanuma Vihari out asü aser iba sülen taruba over nung Rishabh Pant-a out süadok. Iba sülen Mohammed Shami-a deep nung catch out asü aser Jasprit Bumrah-a Jadeja nem strike agütsütsü merangba mapang run out asü.
Run kanga ishika dang yangulur asaya akoktsü meranga asaya tenzük aser India nunger bowler temi ball kanga junga aon. Lunch tashi nung New Zealand puri run 46/0 yanglu aser asaya akoktsü asoshi run 86 nüngdaka liasü.
Tanabuba session nung Tom Latham (52) wicket keeper-i out sütsü. Iba sülen Kane Williamson (5)-a kanga kara out süadok. Asayar ana ya Umesh Yadav aser Jasprit Bumrah nati out sütsü. Asaya akoktsü asoshi run 11 dang nüngdaka aliba mapang Bumrah-i Tom Blundell (55) out sütsü.
New Zealand-i asaya akokba mapang nung Ross Taylor aser Henry Nicholls na batting mena liasü. Parnoki iba asaya anogo 3buba nung kokogo.