New Zealand nung menoknok tesashi anok; Tsunami adoktsü akok

Christchurch, November 13 (Agencies) : New Zealand nung menoknok tesashi ka anokba ajanga power aser phone services aika raksatsüogo aser iba menoknok sülen tsunami adoktsü akok ta kümdanga alitsü osang metetdaktsüogo, ta US Geological Survey-i ashi.
Tanep anokba menoknokji Richter scale nung 7.8 tashi liasü aser menoknok anokba tiyongtsüji Christchurch nungi kilometer 90 shi pilar liasü.
Küm 5 tejaklen kasa tesem nung 6.3 tashi nung menoknok ka anokba lendong nung nisung 185 tashi taküm sama.
Tanep 12:02 ako (par mapang) nung menoknokji anok aser mezüngbo menoknok indang tashiji 7.4 ta asadangtetba osang metetdaktsü, saka tatsüka lir tashiji tuluba liasü ta osang jangjashitsü. Menoknokji ali telunglen kilometer 10 shi dak dang ir anokba ajanga New Zealand linük ajungalen anokshi.
New Zealand ya Australian aser Pacific tectonic plates arrtsü nung lir aser iba tesem dang “Ring of Fire” ta ajar. Iba tesem nung kümshia menoknok 15,000 shi anoker.