New Zealand nung nisung 49 khaset

Christchurch, March 15 (Agencies): New Zealand nung lokti khasetba mapa atema nisung pezü dak temulung melemi bilemer aser par pezü rongnung nisung kati iba mapa meinyakdang ‘Great Replacement Manifesto’ ta ser online nung tezüluba ka sangdong.
Tanü New Zealand kübok Christchurch yimti nung aliba mosque ana nung tekülemer 49 tashi khaset.
Iba mapa ya Brenton Tarrant ta ser Australia nunger kati inyak aser pai iba tatalokba Facebook nung live sayu.
Video nungji pa maitsü jangjaba sülen police-i pa puogo, ta AFP osang ajanga metetdaktsü.
Pai upload asüba tapak 74 manifesto nung, ‘tangalen nungi arua alirtemi Europe nung nütsüng yongsük ajangtetogo’ ta shia lir.
2017 elections nung France lennir Marine Le Pen tamakok anguba aser 2017 Stockholm truck attack nung arishi küm 11 tain Ebba Akerlund asüba ajanga pai iba mapa inyaktsü telemtetba agi ta Brenton Tarrant-isa metetdaktsü.
Pai live sayuba video nungji pa gari ka nung mener mosque kati aoba aser ki telungi ir tekülemertem dak injang khaloktsüba lir. Minute ana majungdang pai cartridges melenba video nungsa angur.
Ajisüaka, YouTube-i video ji agien aser pa indang Facebook account aser Twitter handle shibantsüogo.
Iba tatalokba sülen Australia Prime Minister Scott Morrison-i Brenton Tarrant ji Australia nunger ta osang jangjatsü.
“Taochi maliba kiralongrari tesempatsü mapa inyakba onoki aitsür” ta Morrison-i metetdaktsü.
Taonung 7:25 ako meta (par mapang) Parliament nung osangbener senden ka nung jembidang New Zealand Prime Minister Jacinda Ardern-i “iba ya kiralongrari inyakba mapa ka ta züngshitsü” ta metetdaktsü.
“Taonung 7:00 ako tashi nung nisung 40 taküm samaba osang angashiogo aser iba atema kanga jashir” ta laisa ashi.
“Linwood mosque nung nisung 10 taküm sama aser Deans Avenue Mosque nunga nisung 30 asü” ta Jacinda Ardern-i ashi.
“Iba ya tasa junga atonger inyakba mapa ka ta ajiteter. Temulung melemi bilemertem indang garitem nung explosive devices ana yua aliba nguteta raksaa endokogo” ta laisa shisem.