New Zealand school tem nung tetsür aser tebur ajaki semtetba süoshi asemtsü

Wellington, March 21 (Agencies) : New Zealand primary school nung tetsür aser tebur bendanga asemba half pant mesüra skirt tatsü, uniform tem joko masemtsü, saka tetsür aser tebur ajaki semtetba sobutsü, kilt aser trousers tema asemtsü, ta Mongulbarnü osangbenertemi metetdaktsü.
2015 küm South Island nung aliba Dunedin North Intermediate school nung azünger tetsür kaketshirtemi joko skirt tatsü masemtsü ta ashiba sülen iba temelenshi ya adok, ta osang ajanga ashi.
Dunedin North Intermediate school nung arishi küm 10 nungi 13 tsüngda, kaketshir 200 dak tema lir.
School-i tetsürtem trousers asemtsü melaba sülen 2016 küm nungi tetsür kari teburi asemba longpant sema liasü.
Aji oda süaka, trousers asemertem dang tebur amai angur ta asayamenütsüba tebilemtsü ka adok.
“Mezüng iba temelenshiji temerenshi ka amai aküm,” ta Mongulbarnü Dunedin North Intermediate school nung Principal Heidi Hayward-i metetdaktsü.
“Onoki tetsürtem dang skirt mesemi teburi asemba uniform semang ta ashi. Saka tetsürtem iba sobutsü asemdang tebur amai angu aser na tetsür aser tebur ya ta asayamenütsütepba liasü,” ta Hayward-i osangbenertem dang ashi.
Tangbo school nung tetsür aser tebur ajaki semtetba uniform tapu balala pungu semtettsü — shorts, long shorts, kilt, trousers mesüra culottes.
2016 küm Britain nung ‘gender neutral’ uniform asemtsü sangdongba sülen ano tan New Zealand nunga uniform melentsü temelaba agütsü.