Neymar alitsü asoshi inyakyim atsüshitsü asayartemi mulunga liasü

Mongputeni/October 31, 2019 (Agencies): Paris St Germain nungi Neymar tanaben meyipa anir arutsü asoshi Barcelona puri kanga jangrar aser asayartemia senotsü tsütsü club nongita yaritsü atema parnok itasen monur agitsü mulunga liasü, ta defender Gerard Pique-i metetdaktsüogo.
Küm ana tejakdang otsü tasen ka yanglua euro million 222 yong Barca puri Neymar PSG dang ayok aser taoba transfer window nung parnoki pa alizüktsü asoshi kanga merangdangogo.
Ajisüaka September ita transfer window meshibang dang club ana tsüngda tangatettep ka dangi maruba sülen pa malizüktet.
Barca puri France nunger forward Antoine Griezmann euro million 120 aser Frenkie de Jong million 75 agi alizükogo aser Neymar sen aika indoka alitsü asoshi UEFA Financial Fair Play regulations-i nokdanga liasü.
Iba temzüng ya club kibur takartemi parnok den tokteper tem amokbanga ayutsü nungi kümzüktsü atema benok. Kasa mapang nung iba ajanga revenue tsütsü ochishia inyaksangshitsü tuyur aser sen indokba nung liromedemdaktsür.
“Onoki club tir Josep Maria Bartomeu dang, Financial Fair Play regulations kübok inyaksangshitsü atema nüngdak dang süra onok indang contract nung onok tangutsü tim sota atar Neymar alitsü asoshi shidangogo,” ta Pique-i Brehostibarnü Spanish radio station Cadena Ser dang ashi.
“Onoki onok indang contract atsüshitsü renema liasü. Onoki senbo magütsüla saka onok tangutsü tim sen shilem kar mezüng küm mesüi tanabuba mesera tasembuba küm agüitsü asoshi mulunga liasü aser iba ajanga maparen tezübaba kümdaktsüla,” ta paisa ashi.
Season tetenzüklen ken o tembanga mernemtetba ajanga Neymar asaya kar nungi shilem magi-i liasü saka pa September ita nungi asaya tenzük. Pai League 1 asaya pongu nung goal pezü idaktsür lir. Pa tang tetsüng yirur masayai lir.