Neymar-i sen million 46 shi aazüktsü akok

Barcelona, April 12 (Agencies): Spain nung tentetba nungtugu football telok, FC Barcelona telok tenüng nung tongti asayar, Neymar-i Barcelona telok tenüng nung asayatsü tezüngzüktep agiba ajanga pai euro sen million 45.9 shi aazüktsüsa jenjang ajuruba osang ka football asayatsüren den sentakba miim osang yimjak nung sangoktsür, Football Leaks-i metetdaktsüogo.
Brazil nunger Neymar-i Santos telok toktsür Barcelona telok tenüng nung küm 5 tashi football asayatsü tezüngzüktep 2013 küm agia liasü.
Iba tezüngzüktepji agiba sülen Spain aser Brazil sorkari ozüngi melaba ama sarusaji magütsüba ken o nung ajemdaker arishi küm 24 tain Neymar aser tebu na arishitsü tenzük.
Neymar aser tebu nati tashishitsü ken o ajurutsü tenzükba yong Barcelona teloki Neymar nem taa sen agütsüba osang kar yimjak nung sangdonga liasü.
Barcelona teloki kümshi ita sen euro sen million 5 agütsütsü nangzükba den külemi, par telok nung züngsemba taa sen euro sen million 8.5 tashi Neymar nem agütsüba osang jangjaogo.
Champions Leauge, La Liga aser Copa del Rey nunger densemba, asayamong 3 tashi nung shilem agiba sülen Neymar-i yaküm euro sen million 1.7 tashi talila ngusemba osanga jangjaogo.
Ano, Neymar-i Barcelona telok nung züngsema alidang külem asayar, Argentina nunger Lionel Messi den temaba jenjang ngua Ballon d’Or sempet agizükra, pai euro sen 425,000 talila ngusemtsü lenmang lapokja lir.
Ano külen, 2018 küm sülena Neymar maneni par telok nung züngsemtsü tezüngzüktep agishitsü asoshi Barcelona teloki Neymar tebu ajungshitsü tenzükba osang angazükogo.
Yamaji atsütepba mapang ka nung Paris Saint-Germain aser Manchester United telok natia Neymar nübo alizüktsü asoshi euro sen million 190 agütsütsü mulunga aliba osang metetdakja lir.