NEZCC-i matamabensar tanurtem atema UMANG benjong ayonga among

Dimapur, August 23 (TYO) : North East state tem nung North East Zone Cultural Centre (NEZCC)-i India sorkar inyakyim nung keta aliba ama, mata mabensar tanurtem atema Umang benjong ayonga among.
Iba benjong ya mata mabensar tanurtemi timtem aser tetsükdaktsü ajuruba temai adoka metetdaktsütsü aser anema alir tanurtemi parnok bendang mamshii liromedema litettsü atema sabang sadema lapoktsütsü nükjidong nung aka.
Umang benjong ya sobaliba balala ajanga item tanurtem anema aliba tanurtem den saku süa maongka balala lapoktsütsü atema amongba sentong ka lir.
North Eastern nung Assam, Meghalaya, Nagaland, Arunachal Pradesh, Sikkim, Manipur aser Mizoram state tem nungi iba benjong nung mata mabensartem parnok nisung 350 dak tema den parnok tsüraburtema dena liasü.
Iba sülen ano August 20, 2016 nüa state balala nung iba kasa benjong amongtsü sentong lir.