NF Railway-i GPS Technology amshia tzüsü tebilemtsü koktettsü

Maligaon, Aenjeti 10 (Agencies): Tzüsü agi nungbangba mongpu nung mapang shidak amshia train tem jajatsü asoshi GPS nung ajemdaker train anir nem ‘auto warning’ agütsüba system ka Northeast Frontier Railway (NFR) ajanga amshitsü.
Iba device dang ya FogPASS (Fog Pilot Assistance System for Safety) ta ajar, aser iba device nung inbuilt battery aser magnetic base aketba GPS antenna ka NF Railway indang train nung inoktsü. Iba device tuozük seret 1.5 lir aser loco pilot temi bener jajar.
Iba oset ya pilot indang consul nung yutsür aser train arakzüba mapang terasa kar sayur aser LCD screen nung alinük takzütakbonga aruya aliba temaitsü ana sayur. Item temaitsü ya tapu balala indang signal tem aser level crossing gate amala lir.
“Iba tetetzü train-i station adongba mapang station indang ‘home signal’ adongtsü tasazük anünga aliba sayutsü. Iba ajanga pilot-i pa tenük agi signal ya monguaka train ya signal nungi kobika pilaaliar metettsü, aser signal (temerem, tamak mesüra tanen) jangjateta mapa inyaktsü,” ta NFR CPRO, Pranav Jyoti Sharma-i ashi.
Train anirtem nem osang agütsütsü asoshi iba device nung speaker keta lir, aser iba speaker nung ola adoka jembir. Iba device tasenba yagi tzüsü aliba mapang teyari tulu agütsür, ta kuli sütetogo.
Division ajak nung jajaba train nung inoka amshitsü asoshi iba device ya tejang 1101 lemzüktsüogo, ta Sharma-isa metetdaktsü.
Iba kisüng masü saka Railways ajanga loco pilot nem parnoki ajangtsü aliba signal metetdaktsütsü atema track nung detonators yutsütsü asoshi Fogmen yuja lir. Train jajaba lenmang nung tesüksa/tejaksa metettsü asoshi railway ketdangsertmi aonung foot plate inspection aser track patrolling senzür.
“Station nung ketdangsertem aser train nung senzüba ketdangsertem nem Railways ajanga walkie-talkie set teperi agütsüogo. Loco pilot tem nem signal terasa metetdaktsüba kakettem agütsüogo aser tzüsü aliba mapang inyaktsü mapatem counseling agütsüogo,” ta NFR CPRO-i shisem.
Tzüsü aliba mapang railway nung timtem aika ajurur aser item rongnung ketdangser peria mali kümdaktsüba ajanga train tanemi jajatsüsa akümer, waiting list passenger tem timba akümer, ketdangsertem mapang talangba mapa inyaktsüsa akümer.
“Anungji GPS amshia mapa inyakba FogPASS ajanga tzüsü kanga sashia aliba mapang train tekeraba nung jajatettsü,” ta Sharma-isa shisem.