NFBS sen tim mesüi amshiba bushiteta metongshiogo

Kohima, Tsüklai 27 (TYO): Mokokchung district nung 2014-15 tsüngda National Family Benefit Scheme (NFBS) indang sen timi magütsü ta Para-Legal Volunteers, S. T. Yapang Lkr aser Odi Jamir nati Aenjeti 15, 2018 nü osangkakettem nung sangdongba atema department-i osang ka metetdaktsü.
Iba ken o nung ajemdaker Department-i bushisüngdang ka asüdang ozüng alema inyakba ketdangsertemi taila nisung nem agütsüba sen bushitet aser senji Directorate ket nem meyipa agütsü. Ano, sen ajema agütsüba beneficiary tem nem sen ajunga agütsüsem, ta First Appellate Authority, Directorate of Social Welfare Department-i metetdaktsü.
Longkhum yimtsüng nungi nisung ana aser Chungtia yimtsüng nungi nisung anai tasürtem tenüng nung sen 80,000 agizüka agi aser iba senji bushiteta Directorate nem agütsü.
Nisung shia sen 10,000 agütsüba beneficiary 8 nem aser sen manguba beneficiary pezü nem aibelena inyakba ketdangsertem aser staff temi sen agütsüogo aser parnok dang nungi acknowledgment receipt meshiogo, ta Social Welfare Department-isa metetdaktsü.
NFBS kübok Below poverty line (BPL) kibong nung kibong mesür (tebur/tetsür) asüba sülen sen 20,000 teyari agütsür. Kechi komaka ser asüyonga (Natural/Accidental) BPL kibongi iba teyari agitsü akok.