NFGs-i tashiyim agi sen saruba aitsür : ACAUT

Dimapur, November 29 (TYO) : ‘Sorkar ka, Saru Ka’ ta nübortemi mepishiaka Naga Factional Groups (NFGs)-i nübortem timtemba atema tebilemtsü mabener ama ajiteter, ta Media Cell, ACAUT Nagaland-i sangdong ka nung metetdaktsü.
Talisa benjung mongpu aruba mapang, NFGs-i tashiyim agi saru meshiba aser sen saruba osangtem angazüker. NFGs-i shishilembartem dang nungi trade license fee aser Khristmas tenlatem meshitsü tenzükogo. Khristan tesayuba anema inyakba mapa ACAUT Nagaland-i aitsür aser iba mapa ya manenra, shishilembartemi dokantem shibangtsüsa akümtsü, ta sangdong nung shia lir.
Ozüng amertemi aser talisa Dimapur Police-i ozüng alema mapa inyakba mita reprangtsü aser aibelenertem aputsü mepishir.
Shishilembartemi Nagaland sorkari agütsüba trade license tem agizüka lir aser trade license ka lira aji teperi. Anungji, Nagaland sorkari tanga sorkartem inyaksangshi mesüdaktsütsüla aser Nagaland sorkari item ozüng alema mapa inyakba azüoktsü mekokra, parnoki trade license agütsütsü temeten mali, ta ACAUT-isa ashi.