NFHRCC den onok dena lir: PPC

Dimapur, Luroi/August 27 (TYO): Nagaland Foothills Road Coordination Committee (NFHRCC) ajanga state sorkar nem anogo 30 atakzükja tezüluba nung takhangba ka agütsüba nung Phom People’s Council (PPC) dena lir, ta PPC tir Shami Angh aser tezülur H. Sunep Phom nati sangdong ka ajanga ashi.
Sorkari tongtipang maparen nung tejangraba melie inyaka ngua sasa bilemer, koba ajanga meta talang nung aliba nüburtem temeden kecha mongui senzüka yuja arur, ta ashi.
Iba amala temeden rongnung lenmang tajung ya nübur ajak asoshi temeden ka lir. Anungji state sorkar dang nüburtem timtemba reprangteta foothill lenmang ya tongtipangtiba map aka ama inuaktsü ajungshir, ta PPC sangdong ajanga ashi.
Tarutsü asoshi tajungba aginüa nüburtem ajepdang legislator tem kong ali? Sorkar amoa aoba nungi sakang, ta ashi.
NFHRCC ajanga akhangba ama sorkari meinyakra, ajem ajema malitsü. Naga nunger ajunga ajangzüktsü asoshi shidak bilemba nübur ajunga dang iba maparen nungittsü ayongzüker, ta PPC ajangasa ashi.