NFHRCC-i sorkar dang pelar; maneni senotsü lenmang bushitsü ajungshir

Dimapur, October 10 (TYO) : Honibarnü Nagaland Foot Hill Road Coordination Committee (NFHRCC) senden ka Dimapur nung senyur kidang agiogo.
Senden nung Mokokchung aser Mon sector tem nung mapa tembanga inyakba atema state sorkari sen agütsüba osang metetdaktsü.
Sorkari NFHRCC nem magütsüi aliba sen agütsüba pela agizükba den ano maneni iba mapatong tembanga inyaktsü atema senotsü teyari bushitsü NFHRCC-i ajungshi.
Senotsü timtem aliba agi 2015-16 budget nung foothill road mapatong atema senotsü lemzükja mali ta taküm July ita Chief Minister-i NFHRCC dang ashi. Ajisüaka tanü senden nung NFHRCC-i Chief minister aser State PWD o National Highways Minister tem den ajurutepa iba mapatong mesüdaktsüi inyaktsü atema senotsü lenmang bushitepang ta ashitsü bangjemtep.
Anosa, tanü senden nung Ao sector nung tzüngluruwa mapang anendaka aliba mapa tenzüktsü atema contractor tem dang ashitsü NFHRCC-i telemtetba agi.
Doyang Bridge nung mapa tetsükdaktsü kecha melii inyakdar aser apu yangluba mapa noklang nung shilem 30 shi inyakogo, ta senden nungsa metetdaktsü.