NFHRCC-i state sorkar dang mepir

Dimapur, November 4 (TYO) : Taküm tzüngluruwa mapang tenemtsüng lenmang yangluba maparen anendaka ayuba tenzüka inyaktsü mepishir ta Nagaland Foot Hill Road Coordination Committee (NFHRCC)-i bangdakpur dang metetdaktsü.
Tenemtsüng lenmang nung earth cutting aotsü kilometre 8 anünga aliba bangdakpuri tekaratiba nung inyakdaktsünür, ta NFHRCC sangdong ka nung ayongzük.
Tang tashi nung taoba sorkari iba lenmang yangluba nung sen crore 80 tashi agütsüogo saka tang aliba sorkari sen tera danga magütsü lir. Anungji, contractor temi mapa inyaka aotsü atema sen crore 11.5 fund alibaji agütsütsü mepishir, ta parnokisa metetdaktsü.
Senotsü nung tetsükdaktsü aliba ajanga sorkari mapa tenzüka meinyaker ka süra, Committee-i iba mapatong tembanga inyaktsü atema sen lenmang bushitsü asoshi bangdak ketdangsertemi temelaba agüjang, ta NFHRCC sangdong nungsa shia lir.
Tesüiba ita ishika, Committee-i iba mapa asoshi bangdak minister den ajuruteptsü meranga arur saka majurutepteti lir. Iba dak sendakba nung NFHRCC-i November 5, 2016 nikongtsütsü 4:00 ako nung Yashitsungba’er kidang, ENPO dena tribal Hoho 10 den senden ka amentsü ayongzüker, ta sangdong nungsa ashi.