NFHRCC puri Doyang apu yangluba semdang

Dimapur, Tsüklai/Feb. 25 (TYO): Nagaland Foothill Road Coordination Committee (NFHRCC), lokti tentet balala, Department of PWD (R&B) aser construction firm lungjemer February 22, 2020 nü Governor’s camp, Liphanyan, Wokha District nung Doyang apu yangluba tesem semdanga liasü, ta NFHRCC sangdong ka ajanga metetdaktsü.
Otsüsütsü Foothill Road, koba dang Nagaland Expressway ta nüngja agüja ali, iba lenmang yangluba nung shilem ka ama iba apu ya 2014 küm yanglu tenzük. Naga nungeri pongmangba tekeratiba nung asangsang küma aotsüsa Nagaland sorkar aser mapa inyakertemi tekeratiba nung iba apu yangluba renemtsü imlar, ta parnoki ashi.
Iba apu renemer approve süa aliba sen tanüngba agütsütsü asoshi lenmang balaka bushitsü state sorkar dang ajungshitsü NFHRCC ajanga pangjem, koba SPA fund kübok tenzük saka sorkari senotsü teyari agütsüba yimya kar nung melenshiba ajanga SPA teyari ajunga anenadok.
NFHRCC-isa iba apu yangluba firm dang anünga aliba mapa ya memonui tang mapa inyaktettsüba mongpu mapang renemtsü totuyuba agütsütsü pangjem aser kasa mapang mapa inyakba den sütepa mapang shidak nung senotsü teyari ajak agütsütsü asosho sorkar dang committee-i ajungshitsü nangzük.
Iba apu yangluba tesem semdangba mapang apu yangluba firm-ia tebang agi meshitetba kuli aika mechi mapang inyaktsüba ita 39 tashi amajok nung süyidaktsüogo aser ita 24 tsüngda dang mapa inyaktet, ta tezü danga ashi aser mapa inyakba tesem semdangertem dang 2017 küm tesüsaba sen agüjaka iba maparen memonui tajungtiba nung renemtsütsü nangzük.
Mapa inyakba nung ishiben anendakaba sülen ano maneni temulung süa inyakyonga aoba atema department nungi technical tsütsü takotet nübutemia apu yangluba firm dang pelaba lemsatep aser tekeratiba nung iba mapa renlokba indang sorkar ketdangser nem osang sangoktsütsü, ta shia liasü.
Iba tesem nung senden ka amenba mapang Nongothung Yanthan-i anir tawa tentetba LLRPO (Lotha Lower Range Public Organisations) iba senden nung densemba asoshi NFHRCC ajanga pelaba lemsatep aser Chief Engineers PWD(R& B) letter vide no. CE(R&B)/TB-HI/CORD/2019-20/PT-1/3125-28 Dated, Kohima 14thFeb.2020 nung shia aliba ama gari senzütettsüsa lenmang mürektetba mapang parnok kübok aliba EE,PWD(R & B) Baghty Division den teka amteper yariteptsü mepeshia liasü.
Maneni NFHRCC ajanga iba foothill road agi kongshia aliba Executive Engineers, PWD (R&B) tem dang Foothills lenmang ajunga tiptema mürektettsü atema CE ajanga totuyuba agütsüba ama March 15, 2020 tashinung report agütsütsü mepishir, ta sangdong nung shia lir.
Maneni Lotha kin züngsemtem aser Koro New Baptist Church ajanga iba tesem semdanger asoshi chiyongtsü aser achi-ajemtsü renemtsüba asoshia kanga pelar, ta NFHRCC ajanga metetdaktsü.