NFL asaya sayutsü asoshi Amazon-i Twitter melenzük

New York, April 5 (Agencies): Brehostibar aonung NFL Football asaya takümbo Twitter nung masü saka Amazon nung sayutsü. Bodhbarnü osang ka ajanga ashiba agi, Jeff Bezo indang company-i iba ‘tenangzüktep’ atema sen million $50 agütsüa liasü.
“Iba osang ya Twitter atema kanga tamajung lir, kechiyong NFL asaya sayuba ajanga Twitter amshir renloker aser sen aika aar, saka iba dak alaka NFL den longjemer inyakba ya parnok asoshi video prokshiba nung tongtibangtiba shilem liasü,” ta osang ka ajanga metetdaktsü.
Yaküm Twitter-i Brehostibar aonung football asaya 10 ‘live’ sayutsü asoshi National Football League (NFL) den kulizüngtepa liasü. Iba kulizüngtepba kübok NFL-i alima ajunga nung internet ajanga ‘regular-season’ asayatem angati agi sayutsü asoshi Twitter shima liasü.
Twitter-i Brehostibar aonung NFL Football asaya ajak dang angati agi sayua liasü, saka Amazon-ibo parnok indang ‘Prime subscriber’ tem dang dang sayutsü.
NBC, CBS, aser Verizon nunga asaya live parnok channel subscribe sür alir tem dang sayutsü.