NFR zone nung ozüng alema inyaker timba kümogo

Guwahati, January 08 (Agencies): Taoba küm Northeast Frontier Railway (NFR) zone nung 1989 Railway Act alema inyaker timba akümba ajanga Railway Protection Force (RPF) nung ketdangsertem tebilemtsü akar.
Train aser railway station nung mita repranger timba akümba ama 2016 küm ozüng alema inyaker timba kümogo, ta railway ketdangsertemi shia liasü.
2016 küm Railway Act section balala kübok ken-o 12,281 züluokogo aser nisung 1,29,559 puogo. Item rongnung nisung 12,580 bo merenshiogo.
NFR zone nung aibelener apuba shilem 181.79 agi 2015 dang nungi timba liasü. 2016 küm Railway Act kübok ken-o züluokba kanga timba liasü.
“Temelaba makai train ticket alir sen jenjang timba agi ayoker aika railway zone ajak nung puogo. Rainway nung inyaker item nisungtem den sentaktepa alir karbo puogo,” ta RFP-NFR nung Chief security Commissioner, Rattan Chand ajanga Honibarnü metetdakja liasü.
Train nung senzürtem nem tekeraba nung teyari agütsütsü asoshi 182 RPF helpline tasen tenzükogo, ta paisa shisem.
Passenger tem kümzüka ayutsü mechi tejajatak train aser railway station telongzük nung aibelenertem aputsü asoshi RPF-i sentong balala tenzüktsü lir, ta paisa shisem.
“Train nung passenger tetsür-tanur aser teintet rogotem nem security tajungba agütsütsü asoshi RPF-i renemogo. Onoki Government Railway Police den osangolatsü,” ta Chand-i maneni shia liasü.
Railway nung tanur shibelenba nungi kümzüka ayutsü asoshi tali mita reprangtsü asoshi RPD-i renemba metetdakja liasü.
Taoba küm nisung shibelenba 10 puteta liasü aser nisung shibelener 19 pua liasü. Iba den külemi kidang nungi jena aoba tanurtem 2015 nung nisung 162 aser 2016357 kümzüka liasü.