Ngada Mini Hornbill festival tembangogo

Dimapur, Yimpoksüi/November 29 (TYO): Ngada Mini Hornbill festival koba Yimpoksüi/Nov 26 nü tenzüka liasü, iba benjung ya RSA ground, Tseminyu Old town nung Yimpoksüi/Nov 28 nü tembangogo. Benjung tatembangbuba anogo nung Rural Development Advisor, Dr. Neikiesalie Kire aser IT, Science & Technology & NRE Advisor, Mhonlumo Kikon tetushi tesemdenger asü.
Ngada Chief Host ama sentepa aliba lokti den o jembidang Vety & AH & Women Resources Development advisor, R. Khing-i, Ngada benjung nung tetushi tejaokertem pelashishia agizük aser Ngada benjung tepela salem lemsatep.
R. Khing-isa, iba sentong kanga mera keta ayongba atema organizing committee Convenor, ADC Tseminyu, Nokchasashi Ao aser ketdangsertem dang pelaba metetdaktsü.
Dr. Neikiesalie Kire-i o jembiba mapang Government of Nagaland tenüng nung Rengma kin den benjungmung salem lemsatep. Paisa Ngada mini hornbill festival ya tsüngrem nem tenüngsang agütsüba aser nüburtem tsüngda tai toktepba benjung ka ama kanga junga ayong amungba atema parnok tenüng asang.
Kasa mapang nung Mhonlumo Kikon-i o jembiba mapang Rengma Ngada tembartemi pa Ngada Guest ka ama jaokba atema kanga pelaba lemsatepa liasü aser iba den Ngada benjung tepela salem Rengma nunger tem den lemsatep.
Pai kin o kin tsüngda telungjem nung alitsüba dak ajemdaker jembi aser ashiba agi, asenok ajaki tesüiba taküm yimya amadokogo aser taitoktepogo aser tang asenok ka ama lidak ta ashi. Anungji Rengma nunger temi kidanger kin tem den tesunep nung alitsü asoshi ajungshi, aji asünungdang lenla ajak nung terenlok bener arutettsü.
Maneni sentong nung sobaliba tsüngsang aser ken Chogin Range, Lotha Cultural Club (Wokha town Phiro Cultural Club), Tseminyu Lowjvu, Kithagha group, RPO Kohima nungeri ai aser Rengma Baptist Church Kohima Youth Department modern song ka aten. Rengma Officers’ Forum tiri tepela salem lemsatep.
Kenneth Kath-i lokti pelaa agizükba o jembi aser Rev. Fr GL Khing-i sarasademer iba sentong tenzük aser John Wanth-i tepela o jembi.
Benjung amungba tesem nung Tseminyu sub-division kübok yimtsüng balala nungi Areju/stalls 26 lapoka liasü aser item arejutem rongnung Teragonyu yimeri yangluba tajungtiba shimtet. Tanabuba aser tasembuba jenjang nung Phensunyu aser Tseminyu liasü.