Nganlang-i Excise department nung inyakertem dang ochishia inyaktsü ayongzük

Dimapur, October 28 (TYO): Hokolbarnü Directorate of Excise, Dimapur nung Nagaland State Excise Field Staff Association (NSEFSA) senden kaogo, aser iba sentong nung Parliamentary Secretary, B.S. Nganlang Phom tongti tesemdanger liasü.
Iba sentong nung jembidang Nganlang-i, asen state ya ‘dry state’ ka ta sangdonga liaka Excise department-i saru angur, ta ashi aser iba dak sentakba nung pai department ketdangsertem dang ochishia nendaka inyaktsü ayongzük.
Paisa ketdangsertem dang, mapa agi department tenüng tajung sayutsü ajungshi.
Pai ashiba agi, ajaki pei jangraba tesem nung posting aginer, ajisüaka department-i aji oda meinyaktettsü. Iba dak sentakba nung pai, ketdangser/staff ajak kasa maongka angutsü atema department-i tajungtiba agi meranga inyakdar, ta metetdaktsü.
Mapa nung shimba aser promotion tütsüba dak sentakba nung pai, ajak ochi temeten angutsü atema department-i inyakyim tajungba küma yanglushidar, ta ashi.
Pa nem temepishiba ka agüja aliba atema telangzüba agüja Parliamentary Secretary-i, ibaji sorkar matsüngdang benoka jembitsü aser tekaratiba nung mapa küma inyaktsü merangdar, ta metetdaktsü.
Iba senden nung NSEFSA-isa temepishiba ka nung Parliamentary Secretary dang, mapang shitak nung nüburtem complaints atema inyaktettsü, ozüng alema yi mita aodang amshitsü atema pool/patrol garitem agüjang ta mepishiogo.
Kasa senden nung Secretary Excise, Nikashe Sema, Commissioner of Excise, K Tarep Imchen aser Additional Deputy Commissioner, Excise, Pitongshe Sangtam nungeria o tasütsü jembia liasü.