NGBF-i Citizenship (Amendment) Bill 2016 khenyongi magizüker

Dimapur, January 21 (TYO): Citizenship (Amendment) Bill 2016 dak lendong keta lir ta Nagaland GBs Federation (Village chieftain)-i metetdaktsü.
Iba Bill ya Act ka küma yanglu nungbo lendong aika bentsür arutsü. Iba onük atema Naga political party tem tsüngda o atsüteper saka tang tashi nung telemtetba takang ka danga magi lir. Tanü Nagaland tensa reprangdang, ozüng alema arurtem indang khuret tulu ajurua lir saka iba ama mapang ka nung State Cabinet-i Bill meyipa reprangshitsü ta lemtetbaji tia maka aser parnok dak state kümzüka ayutsü temulungtetba maliba sayur, ta NGBF-i ashi.
BJP den yaritepa sorkar kümteta aliba tanga Northeast state temi aser BJP MLA temi iba Bill songjen meyipa agitsüla ta takhangba agütsüdang, Nagaland sorkarbo ola madoktettsüsa kechi agi aleneta lir? Tarutsü putui asenok atakatem masütsü atema tanü asenoki iba Bill ya khenyongi magizüktsüla, ta parnokisa ashi.
Nagaland sorkari Arrla 371(A) ajanga Naga nunger Citizenship (Amendment) Bill nungi kümzüka ayutsü ta ashir saka Arrla nung senso agütsüba indang kecha shia mali aser Citizenship Bill ji ozüng küma yanglura, asenoki ozüng tsütsü makoktsü, ta Nagaland GB Federation-isa kümdangtsü metetdaktsü.
State sorkarisa Bengal Eastern Frontier Regulation Act 1873 (BEFRA) nung ajanga Naga Citizenship kümzüka ayur ta ashir, saka iba ya Act aibelena angatetba ka dang lir, kechiyong Citizenship (Amendment) Bill 2016 aser Inner Line Permit (ILP) tsüngda tesentaktep kecha mali.
ILP mesüra Restricted Area Permit (RAP) ya state nung khen atema agütsüba lir saka CAB 2016 ajanga linük indang senso temeten agütsütsü aser iba jagi timtem jenti bentsür arutsü. Talisa, Nagaland nung BEFRA 1873 ozüng liaka, ozüng alema arurtem tejenokdak tajung ka kümogo, ta NGBF-isa tenük lapoktsü atema olen ka ashi.
Citizenship (Amendment) Bill 2016 ya tamangba yimsü nung ajemdaker yangluba lir aser Lok Sabha nung agizükba atema sasar. Iba Bill ajanga ozüng alema arurtem North east state tem nung sadoksadoka lidaktsütsü atema lenmang lapoktsür. Ajisüaka, Nagaland sorkari zübazüba toktsür, kobi melii ozüng alema arurtemi India senso bener Nagaland nung arua alitsü aser wadang ajak nung parnoki ketdangsütsü.
State sorkari CAB 2016 atema lemtetba ya Naga nunger yoka chia Centre-i lemtetba sülen tashi angaa anidakba inyakyim ka lir.
State Cabinet-i kin hohotem, civil society teloktem, NGOs, political party tem, sensotem aser sendaktepa alirtem den senden ka amentsü ta asübaji pelaa agizüker. NGBF ya Naga nuger sobaliba ozüngtem ketdangsüba telok ka lir aser Naga nunger anema inyakba mapa ajak anema ola adoktsü.
Joint Committee on Prevention of Illegal Immigrants (JCPI)-i January 20, 2019 nü osangkakettem nung ashiba ajak NGBF-i agizüker aser posema nungiter. JCPI ya Naga nunger ajangzüktsü aser ajungtsü atema inyakba telok ka lir aser onoki parnok teti posema nungittsü, ta NGBF-isa metetdaktsü.