NGO kati Assam tzü metsüng agi kongshiba tanurtem yaritsü

Guwahati, August 2 (Agencies) : Assam kübok district asem nung tzü metsüng agi kongshir aliba tanurtem NGO kati yaritsü.
‘Tanurtem küzükang’ (Save the Children) NGO-i Assam nung Dhemaji, Lakhimpur aser Majuli district tem nung aliba tanurtem aser kinüngertem atema teyari ajak agütsütsü, ta NGO Chief Executive Officer Thomas Chandy-i ashi.
Iba NGO yagi mezüng phase nung anema aliyim aser merükmejutsü sayuba den külemi tarpaulins, hygiene kits, yiptensü, atem nung alemtsü lempak, tzü aser chiyungtsü ayutsü atema molok agütsütsü.
Tanurtem nüngdakba kanga junga lemdanga metettsüla kechiba süra netsüng yongsük noklang nung shilem 40 tashi tanurtem lir aser tesem balala nung parnok nüngdakbaji balala lir, ta Chandy-i ashi.
Assam State Commission for Protection of Child Rights (ASCPCR)-i tzü metsüng agi kongshir aliba tanurtem timtem ngua iba ama tajaba agütsüba atema onoki pelar, ta pai ashi.
“Tang rongdak nüngdaktemji mozü, chiyungtsü aser kaketshitsü tem lir. Ano tzü metsüng lendong agi aoksar aliba tanurtem ya tekolok shisatsü süngjema alitsü atema teyari agütsütsü kanga nüngdak,” ta paisa ashi.
Tanurtemi matateter anungji iba ama tensa tamajung nung sorkar aser lokti balalai NGO tem nungittsü kanga nüngdak, ta Chandy-i ashi.

You must be logged in to post a comment Login