NGO temi Meghalaya sorkar mozüki nungi Laishiba agiendaktsüner

Shillong, Mongputeni/Oct. 09 (Agencies): National Institute of Technology (NIT) nungi süngyanglu ka indoktsü asoshi Jaintia Students’ Union (JSU) temi akhangba sülen NGO ka – Legal Rights Observatory (LRO) – ajanga state chief secretary, health secretary aser East Khasi Hills district indang deputy commissioner dangi Shillong Civil Hospital aser Meghalaya nung sorkari lapokba tanga mozükitem nungi Temeshi Laishiba indoktsü takhangba agüja züluogo.
Iba NGO ajanga ashiba agi, “NIT nung süngyanglu otsü den mesüktepa, Shillong civil hospital nung shiranger yipten anasa Temeshi Laishiba copy yua aliba tekeraba nung indoktsü onoki mepeshir. Iba email nung keta aliba noksatem nung nenoki Shillong civil hospital indang ‘private deluxe room’ tem nung Laishiba yua aliba angutsü.”
NGO ajanga ashiba agi, Laishiba yuja aser Niam Tynrai/Niamtre yimsü amanger (Khristanpur masüba shiranger) dang taneptsü angutsü asoshi Laishiba azüngtsü ajungshiba ya temang aser tekolok anibelendaktsüba lir aser pa/la temeden nung aibelenba maparen ka lir. Ibai United Nations ajanga sangdongba Universal Declaration of Human Rights Arrla 18 anema inyakba lir, ta NGO ajangasa ashi.
Laishiba indoktsü ajungshiba dak alia parnoki district medical officers/health director tem dang tekeratiba nung Meghalaya nung sorkari lapoka aliba mozüki ajunga semdanga Laishiba aser tamangba yimsü dak sendakba osettsüsettem indoktsütsü takhangba agütsü.
Evangelist temi sorkar meyong mozükitem semdanga Niam Tynrai yimsü amanger shiranger dang taneptsü angutsü asoshi Lai zünga Yisu külemtsü ajungshiba inyakyim ajunga nokdangtsüla, ta LRO ajangasa ashi. Meghalaya sorkari lapokba mozüki nung iba amala inyaksangshiba osang agütsütsü asoshi helpline/call center lapoktsü parnokisa ajungshia liasü.
“Iba shiti nung shia aliba ama mapa meinyakra onoki Union health ministry dangi oa iba maparen nung teka amuoka aibelenba ketdangser dak tapet temerenshi agütsütsü asüngdangtsü,” ta LRO-i ashi.
JSU-i September 29 nü NIT ketdangser dang Ganesha süngyanglu indoktsü osang ka metetdaktsü aser iba amala osettsüset ayuba ajanga tanga yimsü amangba kaketshir aser tesayurtem mulungjang nung iba reji indang ‘secular fabric’ raksatsür aser kin anema tamajung bilemba adokdaktsür, ta shia liasü.