NGOs ji sorkar tenzüker ama züngshitsü, kiojen sangdongtsüla

New Delhi, July 25 (Agencies): NGOs mesüra tajangzük mebushiba tentettem shirnoki sorkar fund nung sen crore ka dak tema agizüker mesüra bendanglen nungi sen tenla lakh 10 dak tema angur, item tentet den office ketdangpurtemji tang nungibo sorkar tenzüker ama züngshitsü aser parnok kiojen aser rongsen den parnok kinungtsü aser chirnur rongsen July 31, 2016 nü tashi nung sangdongtsüla, ta Centre-i metetdaktsüogo.
Iba telemtetba ajanga item ama tentettemji Lokpal mesüra National ombudsman küboki aittsü. Lokpal ozüng ajanga, sorkar tenzüker ajaki pei indang kiojen aser rongsen den parnok apuani aser chirnur kiojen-rongsen sangdongtsü latetja lir.
Personal ministry tongti ketdangser kati, “Sorkari senotsü agi bendanga yariba mesüra tera agi yariba, mesüra küm shia sen tarulen crore ka dak tema aliba society aser tentet nung director, manager, secretary mesüra ketdangser mashie teinyakdakpur aser tamalen inyaka alirtem ajak iba ozüng küboki aittsü,” ta metetdaktsü.
Ajisüaka NGOs-i, parnoki iba tetuyuba anema nokdaktsü tajemdakdak lir, ta shiogo.
“Ochishia inyaktsü atema benokbaji onoki akhümtsübur, saka iba tetuyuba nung tongtibang onük mali aser nübur tenzükba nung mapa tajung inyakertem nem temerenshi ang agüja tembanger,” ta National Foundation of India, Amitabh Behar-i ashi.
Paisa, züngzükja aliba anogo (July 31) atongtsü anogo pongu lia NGOs-i sorkar nem parnok tebilemtsü angatetdaktsütsü merangdang iba anogoji atsülangtsü imlar, ta ashi.
Behar-i, iba ozüng anema nokdaktsü tebilemba lir, ta ashi.
“Lokpal ozüng ya taoba Congress-i aniba UPA sorkari benok, anungji tang tetuyuba ya tan aliba sorkar ozüng ka masü,” ta paisa shisem.
2015 küm Centre sorkari NGOs 10,000 dak tema registration anenja liasü.
Taküm June ita nunga Centre sorkari, Gujarat rara nung takoksa angurtem atema inyakba Teesta Setalvad’er NGO, Sabrang Trust-i joko bendanglen nungi senotsü teyari magitettsü, ta metetdakja liasü. Yaküm home ministry-i parnok indang license anenja parnok dang bendanglen nungi aruba senotsü tenla osang asüngdanga liasü.