NH-2 noktangba takok ngua kaogo; MTLT-i tsüngdong oa yaritep

Kohima/Mokokchung, October 07 (TYO): Tanü Bodhbar nü Lotha Hoho Wokha aser Rengma Hoho nati ayongzüka National Highway-2 nung Tseminyu sub-division nungi Wokha district tashi ghonda 12 gari senzüba noktangba mapang mepetmesü kecha mataloki tesünep nung tembangogo.
Iba tenokdangba ya tanep 6:00 ako nungi nikongdang 6:00 ako tashi ayongzüka liasü.
Iba osangkaket den phone ajanga jembidang Lotha Hoho mendenbuba, Mhao Humtsoe-i, “Mepetmesü kecha matalok aser anogo piyong gari mesenzüi liasü,” ta ashi.
Lotha Hoho lenirisa, iba tesem nung lenmang mejungi aliba yanglushitsü atema sorkari mera magira Hoho anati ano lungkak tesashiba aittsü, ta shiogo.
Ano tanga sangdong ka nung Mokokchung Town Lanur Telongjem (MTLT), Media Cell-i, MTLT-ia Lotha aser Rengma nüburtemi Wokha-Tseminyu sector nung lenmang majungba anema gari senzüba noktangba sentong nungtiba temaitsü MTLT Tir, Imkummeren Jamir lenisüba nung MTLT ketdangsertem aser Mokokchung lanurtem Doyang apu tashi oa sentong ayongzükertem ajurua liasü, ta metetdaktsü.
MTLT-i Lotha Hoho, Lotha Women Hoho aser tangartem ajurua jembiba den külemi Lotha aser Rengma nüburtemi gari lenmang yanglutsü atema inyakba mapa MTLT-i pusemer ta shiogo. MTLT-isa iba sentong ayongzükertem nem refreshments agüja liasü.
Lotha Hoho lenirtemia MTLT-i pusema nungitba pela agizükogo.
Maneni MTLT-i state sorkar dang lenmang tajungba atema nüburtemi ayimtenba angatsüla aser tekaratiba nung lenmang yanglushitsüla ta shiogo, ta MTLT sangdong nungsa shia lir.