NH-2 noktangtsü ayongzükba pusema nungiter: MTLT

Mokokchung, October 06 (TYO): October 7, 2015 nü Lotha aser Rengma adianutemi National Highway-2 (taoba mapang NH 61) nung gari senzüba nokdangtsü ayongzükbaji onoki pusema nungiter, ta Mokokchung Town Lanur Telongjem (MTLT) Tir, Imkummeren Jamir aser Secretary Taliakum Pongen nati sangdong ka ajanga metetdaktsü.
MTLT-i ashiba agi, bangdak department-i iba tongtibang lenmang ya küm aika senzüka yutsüogo, koba ajanga anogoshia ainlen senzür noklang aikati timtem ajurua arur.
Tseminyu aser Wokha tsüngda NH-2 lenmang kanga majungba atema Lotha Hoho aser Rengma Hoho na mepelabaji MTLT-i angateta lir.
“District aika state yimtiba, Kohima den sentaktepba lenmang, NH-2 tia mejungi aliba atema MTLT-ia jashia bilemer. Iba tongtibang National Highway nung anogoshia ainlen jajar meyirjang aika senzür aser iba Highway, talisa Wokha aser Tseminyu tsüngda lenmang nung ainlen jajartem lendong ajurutsü atema MTLT-i tebilemtsü katsür. Iba Highway nung gari lendong aika atalokba indang MTLT-i meteta lir, aser ibaji timbaka lenmang kanga majungba ajanga atalokba lir,” ta MTLT sangdong nungsa shia lir.
Ainlen senzürtem atema tebilemtsü kaja MTLT-ia Lotha Hoho aser Rengma Hoho nati October 7 nü NH-2 nung gari senzüba nokdangtsü ayongzükbaji pusema nungiter. Lotha aser Rengma nungertemi gari lenmang yanglutsü atema inyakba mapa MTLT-i pusemer, ta MTLT mendenpurtemisa metetdaktsü.
“Bangdak department-i nüburtemi ayimtenba ola anga National Highway-2 nung Tseminyu aser Wokha tsüngda lenmang tekaraba nung yanglushitsü akhanger,” ta MTLT-isa shisem.

You must be logged in to post a comment Login